منتخب اشعار برائے بیت بازی!

[ظفری]

یوں عرض و طلب سے کب اے دل، پتھر دل پانی ہوتے ہیں
تم لاکھ وفا کی خو ڈالو، کب خوئے ستمگر جاتی ہے۔۔۔۔۔۔
​

 

[سارا]

یاد ہے میں کیا تھا‘ پر اب جانے کیا ہو گیا
آئینے میں شکل دیکھے زمانہ ہو گیا

ختم ہوئی ڈائری‘ گرتے ہوے پتے ریاض
آ گیا ماہِ دسمبر‘ سال بوڑھا ہو گیا۔۔

 

[شمشاد]

اس سے میں کچھ پا سکوں ایسی کہاں امید تھی
غم بھی وہ شاید برائے مہربانی دے گیا

 

[ظفری]

اپنی کتابِ عمر کی ساری سطروں میں
ہم نے کس کے خواب لکھے تُم کیا جانو

 

[شمشاد]

ظفر صاحب کے جواب میں بہادر شاہ ظفر کا ایک شعر


وہ بے حساب جو پی کے کل شراب آیا
اگرچہ مست تھا میں پر مجھے حجاب آیا

 

[ظفری]

چلئے بہادر شاہ ظفر کے شعر کے جواب میں بہادر شاہ ظفر کا ہی ایک شعر ۔۔۔۔

اے ظفر جو حال ہے میرا کروں گا گربیاں
ہوگی اُن کی شرمساری مجھ سے کچھ پوچھو نہیں​

 

[شمشاد]

نظر کو حالِ دل کا ترجماں کہنا ہی پڑتا ہے
خموشی کو بھی اک طرزِ بیاں کہنا ہی پڑتا ہے
(صوفی غلام مصطفٰے تبسم)

 

[ظفری]

یہی دل تھا کہ ترستا تھا مراسم کے لیئے
اب یہی ترک ِ تعلق کے بہانے مانگے

احمد فراز

 

[شمشاد]

یوں سجا چاند کہ جھلکا تیرے انداز کا رنگ
یوں فضا مہکی کہ بدلا میرے ہمراز کا رنگ
(فیض احمد فیض)

 

[ظفری]

گھومنے نکلا تو کتنی بھیڑ تھی
سوچنے بیٹھا تو تنہا رہ گیا
عمر کتنی منزلیں طے کر چکی
دل جہاں ٹہرا تھا ٹہرا رہ گیا​

 

[فرذوق احمد]

گزاری اس طرح عمرِمحبت ہم نے دھوکے میں
وہ مجھکو باوفا سمجھے میں ان کو باوفا سمجھا
حفیظ ہوشیارپوری

 

[فرذوق احمد]

گھومنے نکلا تو کتنی بھیڑ تھی
سوچنے بیٹھا تو تنہا رہ گیا
عمر کتنی منزلیں طے کر چکی
دل جہاں ٹہرا تھا ٹہرا رہ گیا​

ویسے تو میں نے بھی شمشاد بھائی کے ہی آخری لفظ سے شعر کہا تھا مگر میری پوسٹ سے پہلے ظفری بھائی نے کردی تو اس لیے اب میں ظفر بھائی کے لفظ سے ایک شعر اور کہہ دیتا ہوں

اور اس سے نہ رہی طلب کوئی
بس مِرے پیار کی عزت کرتا
پروین شاکر

 

[شمشاد]

اک سخن اور کہ پھر رنگِ تکلم تیرا
حرفِ صدا کو عنایت کرئے اعجاز کا رنگ
(فیض)

 

[سارہ خان]

گنگا تو بہہ رہی ہے مگر ہاتھ خشک ہیں
بہتر ہے خود کشی کا چلن اس رواج سے
تم بھی میرے مزاج کی لے میں نہ ڈھل سکے
اُکتا گیا ہوں میں بھی تمہارے سماج سے

 

[شمشاد]

اک اور دریا کا سامنا تھا منیر مجھ کو
میں ایک دریا کے پار اترا تو میں نے دیکھا

 

[سارہ خان]

اپنا پن بھی اسی بے گانے پن میں ہے
پورا عالم اک دیوانے پن میں ہے
یہ جو تم سے انجان بنا پھرتا ہے
ساری بات اسی انجان پن میں ہے

 

[شمشاد]

سارہ جی بیت بازی میں ایک شعر لکھا کرتے ہیں، آپ دو دو لکھ دیتی ہیں۔

 

[سارہ خان]

اچھا۔۔۔مجھے پتا نہیں تھا ۔۔۔اب 1 ہی لکھا کروں گی ۔۔۔

 

[شمشاد]

یہ جو ہے حکم میرے پاس نہ آئے کوئی
اس لیے روٹھ رہے ہیں کہ منائے کوئی
(داغ دہلوی)

 

[ماوراء]

سارہ جی بیت بازی میں ایک شعر لکھا کرتے ہیں، آپ دو دو لکھ دیتی ہیں۔

~~
بیت بازی میں قطعہ لکھنے پر کوئی پابندی نہیں ہے۔
~~