جوش ملیح آبادی :::::آؤ پھر جانبِ سرکارِ خرابات چلیں::::: Josh -Maleehabadi

طارق شاہ

محفلین
جوشؔ ملیح آبادی

آؤ پھر جانبِ سرکارِ خرابات چلیں
پھر، پئے بندگئ قبلۂ حاجات چلیں

جِن سے تابندہ ہو محرابِ نظامِ شمسی
آؤ، سینوں میں جگائے وہ خیالات چلیں

آؤ پھر جانبِ درگاہِ درخشانِ اُصول
چھوڑکر، دائرۂ زِشتِ فروعات چلیں

ہر نَفَس اِک اُفُقِ نَو ہو برافگندہ نقاب
یُوں اُٹھائے ہُوئے قُدرت کے حجابات چلیں

آؤ پھر حجلۂ سلمائے معارِف کی طرف
بہرِ صُلح و پئے تجدِیدِ مُلاقات چلیں

آؤ اِس گُنبدِ اِشراق کی خاموشی سے
سُوئے بربط کدۂ حرف و حکایات چلیں

آؤ اِس شان سے نِکلیں، کہ ہمارے ہم راہ
چنگ و طاؤس لیے ارض و سماوات چلیں

داہنے بائیں، ملائک کے پَرے ہوں جولاں
پُشت پر، اہلِ مناجات و کرامات چلیں

جِس دُوراہے پہ ہے آویزِشِ کُفر و اِیماں
آؤ، اُس سمت ، پئے فصلِ خصُومات چلیں

تا کُجا، زحمَتِ نظّارَگئ دَیر "صِفات"
وقت آیا ہے کہ سُوئے حَرَمِ "ذات" چلیں

جوشؔ ملیح آبادی
(شبیر حَسن خاں)
 
۔۔۔وقت آیا ہے کہ سوئے حرمِ ذات چلیں
جوش صاحب زندہ باد اور یہ انتخاب پایندہ باد۔۔۔جی خوش تو ہوگیا مگر آنسو نکل پڑے!
 
آخری تدوین:
Top