کاشفی
محفلین
غزل
(جوش ملیح آبادی)
مری مجال، تیری بزم، اور لَن ترانیاں!
میں نقشِ پائے رہرواں، تُو افسر جہانیاں
سخن فروشیاں نہ کر جہانِ حُسن و عشق میں
کہ یاں ہر ایک خال میں ہیں لاکھ نکتہ دانیاں
وہ زیبِ انجمن ہوا تو کوئی بولتا نہیں
معاشرانِ بزم کیا ہوئیں وہ گل فشانیاں؟
ذرا اثر نہ پڑسکا جنونِ ذوقِ دید پر
پیمبروں نے لاکھ کیں نظر کی پاسبانیاں
شدید بَدگمانیوں پہ حُسنِ ظن ہے یار سے
عمیق حُسنِ ظن میں ہیں ہزار بدگمانیاں
عجیب طرفہ راز ہیں، مری شبوں کے راز بھی
جنہیں نہاں کئے ہوئے ہیں سینکڑوں جوانیاں
شبابِ رفتہ کے قدم کی چاپ سُن رہا ہوں میں
ندیم! عہدِ شوق کی سُنائے جا کہانیاں
مری بساطِ میکشی پہ جوش سجدہ ریز ہیں
کر در قہرمانیاں، ہزار ہا کیانیاں
