شاہ حسین متراں دی مجمانی کارن دل دا لوہوچھانی دا ۔ شاہ حسین

[فرخ منظور]

کافی شاہ حسین

متراں دی مجمانی کارن دل دا لو ہوچھانی دا
کڈ کلیجہ کیتا بیرے' سو بھی ہیں نالائق تیرے
ہور توفیق نہیں کجھ میرے' اِک کٹورا پانی دا
سیج ستی نینیں نیند نہ آوے' ظالم برہوں آن ستاوے
لِکھاں کتاب' بھیجا در تیرے' دل دا حرف پچھانی دا
راتیں درد دیہیں در ماتی' ہن نیناں دی لائی آکاتی
کدی تے موڑلے پاوو جھاتی' ویکھو حال نمانی دا
جیویں بھاویے' تیویں کرپیارا' ایہناں لگیاں دا پنتھ نیارا
راتیں دیہیں دھیان تمھارا' جیوں بھاوے ' تیوں تاری دا
تیرے کارن میں پھراں آزادی' جنگل ڈھونڈیا میں پیر پیادی
رو رو نین کرن فریادی' کیہا دوس نمانی دا
دُکھاں سُولاں رَل ایکا کیتا' نہ کوئی سوہرا' نہ کوئی پیکا
آس رہی ہُن تیری ایکا' پلا پکڑ ایانی دا
کہے حسین فقیر کراری' درد ونداں دی چال نیاری
ایہا دیدن میں تن بھاری' اگے سچ پچھانی دا

اوکھے لفظاں دے معنے

مِتراں : سنگیاں
مجمانی: پروہن گیری
لوہو: خون
بیرے : ٹوٹے
نینیں: اکھاں
برہوں : ہجر۔فراق
کتاب : چٹھیاں
دیہیں : دیہاڑ نوں
درماتی: پریشانی
کاتی : نیزہ
پاوو جھاتی: نظر پاوو۔
پنتھ: مذہب
نیارا: وکھ
لگیاں : عشق
پیر پیادی : پیدل
دوس: گناہ
آس: امید ۔آسر
ایکا : تیرا اک ہی دا
پلا : پلو
ایانی: نادان۔مورکھ۔ نکی نیانی
دردونداں : درد منداں
نیاری : وکھ
ایہا : ایہو

 

[محمد وارث]

خوب اے۔

شکریہ جناب پوسٹ کرن لئی۔

 

[فاتح]

واہ واہ واہ
میں آپ ایہہ کلام پڑھنا چاہندا سی تے جدوں مینوں اک سنگی ولّوں ایہدا اک مصرع لبھیا (بھانویں اوہ غلط ای سی) تے محمود غزنوی ہوراں نے اوہنوں ٹھیک کیتا تے میں سوچ ریا سی کہ شاہ حسین دا ایہہ کلام کتھوں لبھ سکدا اے تسی تے جیویں دلاں دیاں بجھارتاں بجھ لیّاں نیں۔
نال ای تہاڈے گھلے ہوئے اکھر "پروہن گیر" دی سند وی پچھنا چاہ ریا سی تہاڈے کولوں، اوہ خواہش وی ایتھے پوری ہو گئی۔
بڑی مہربانی اے جی تہاڈی۔

 

[فرخ منظور]

بہت شکریہ جناب وارث صاحب تے بہت شکریہ جناب فاتح صاحب۔ پنجابی کلاسیکی کوئی وی کلام چاہی دا ہووے تو مینوں یاد کر لیا کرو۔

 

[Saraah]

بی اے سلیبس وچ ایہ کلام شامل سی اوہدوں دا پسند اے

شئیر کرن لئی شکریہ

 

[محمد یعقوب آسی]

کافی شاہ حسین

متراں دی مجمانی کارن دل دا لو ہوچھانی دا
کڈ کلیجہ کیتا بیرے' سو بھی ہیں نالائق تیرے
ہور توفیق نہیں کجھ میرے' اِک کٹورا پانی دا