سعود عثمانی لفظوں جیسی پاگل چاہت اس کی بھی ۔ سعود عثمانی

لفظوں جیسی پاگل چاہت اس کی بھی
غزلیں نظمیں بھیجنا عادت اس کی بھی

لگتا تھا کہ اس سے باتیں کرتی ہے
گم سم گم سم ایک محبت اس کی بھی

سب میں رہنا 'سب سے دور نکل جانا
بالکل میرے جیسی حالت اس کی بھی

وہ تو جیسے میرے جسم کا حصہ تھا
جھیلتا رہتا تھا میں وحشت اس کی بھی

خواب کے بدلے اشک چکانے پڑتے ہیں
قسطوں میں جاتی ہے قیمت اس کی بھی

(سعود عثمانی )
 
Top