حسان خان
لائبریرین
فلک کے جور و جفا نے کیا ہے مجکو شکار
ہزار کوس پہ ہے جائے یک تپیدن دار
خرابِ کوہ و بیابانِ بیکسی ہوں میں
برنگِ صوتِ جرس ہر طرف ہے میرا گذار
بغیرِ خوردنِ خوں کب نہار ٹوٹے ہے
سوائے گریۂ صبح اب کہاں ہے آبِ خمار
لگیں نہ داغ سو کیوں پھیکے میرے سینے پر
نمک نہیں نظر آتا بجز رخِ دلدار
سو وہ بھی دیکھنا ملتا نہیں ہے گھر بیٹھے
مگر ہوں ہند میں رسوائے کوچہ و بازار
سوائے نالۂ جاں سوز کون ہے دل سوز
بغیرِ آہِ سحرگاہ کون ہے غمخوار
جنوں میں جب سے خوش آیا لباسِ عریانی
نہیں ہے دامنِ صحرا میں تب سے مجکو قرار
ہمیشہ ساتھ ہے دامن سوار لڑکوں کا
مگر کہ خاکِ وفا سے بنا ہے میرا غبار
عجب ہے مجکو جو تو دیکھنے نہیں آتا
رہا ہوں ایک تری انکھڑیوں کا میں بیمار
ہوا ہوں جورِ فلک سے نپٹ ہی زار و نزار
پہونچیو یا خلف الصدق حیدرِ کرّار
شہا غلام کو تیرے یہ زورِ بازو ہے
کہ وقتِ جنگ جو لے کر کماں کو ہووے سوار
اگر پہاڑ ہو دشمن تو اُس کے سینے میں
کماں سے چھوٹتے ہی تیر بند ہو سوفار
لگاوے پھر وہیں دو چار ایسے پے در پے
کہ ایک کا ہو نشاں دوسرے کی جائے قرار
کرے ہے فخر بہت اوج پر فلک شاہا
رضا جو ہو تو کروں تیرے روضے کا بستار
کہ انفعال ہو لاف و گزاف سے اُس کو
زمیں ہے صحن کی جس کے یہ گنبد دوّار
کرے ہے جوہرِ اول نگاہ جس ساعت
تو ایک ہاتھ سے تھانبے ہے سر اُپر دستار
امامِ ہر دو جہاں جس کی آستاں کی خاک
رکھے ہے رتبۂ کحلِ جواہر الابصار
زہے وہ روضہ جہاں دیدۂ ملک ہیں فرش
قدم کو رکھتے ہوئے اُن پہ آتے ہیں زوّار
اگر طلوع ہو خورشید سامنے اُس کے
ہر ایک ذرے کو واں کے ہے یہ لبِ گفتار
کوئی کہے کہ یہ کیا شوخ چشم شپر ہے
کوئی کہے کہ یہ ہے موشِ کور ناہموار
لیا ہے روزِ سیہ نے بہت اُسے گھبرا
چلی ہے چھوڑ کے حیراں ہو رخنۂ دیوار
شعاع روضے کے قبے کی ہے گی عالمگیر
پھرے گا سایۂ شب اب جہاں میں ہوتا خوار
بہ صانعے کہ یہ نقاشیاں ہیں سب اُس کی
زمیں ہو یا ہو فلک یا حجر ہوں یا اشجار
بہ احمدے کہ نبوت ہوئی ہے اُس پر ختم
بہ فاطمہ کہ وہ ہے بنتِ سیدِ مختار
بہ مرتضیٰ کہ ولایت مسخر اُن نے کی
بہادری ہے غلاموں کی جسکے فنّ و شعار
بہ آں امام کہ کشتہ ہے زہرِ قاتل کا
گرے ہیں لختِ دل اُس کے زمیں پہ کٹ کے ہزار
بہ آں شہید کہ تشنہ لب و شکستہ دل
موا ہے دشتِ بلا میں ہیں اب تلک آثار
کہ جب ہلالِ محرم نمود ہوتا ہے
جہاں میں کرتے قیامت ہیں اُس کے ماتم دار
بہ سینہ سوزیِ داغ و بہ آتشِ ہجراں
بہ آہِ سردِ سحرگاہی و بہ نالۂ زار
بہ سرد مہریِ شیریں، بہ کینۂ خسرو
بہ گرم جوشیِ فرہاد و سختیِ کوہسار
بہ عشقِ دیر، بہ طوفِ حرم، بہ سعیِ تمام
بہ لوحِ مشہدِ عاشق، بہ سوزِ شمعِ مزار
بہ آب و رنگِ گلستاں، بہ بیکسیِ اسیر
کہ اس کو کنجِ قفس میں رہے ہے بادِ بہار
بہ ساغرِ مئے گلگوں، بہ توبۂ سنگیں
بہ دلنوازیِ ساقی، بہ ابرِ دریا بار
بہ دستگیریِ چاک و بہ بے قراریِ جیب
بہ سینہ کاویِ دشنہ، بہ زخمِ دامن دار
بہ حیرتِ رخِ جاناں، بہ چشمِ واماندہ
بہ سعیِ باطلِ ناخن، بہ عقدۂ دل کار
بہ قلقل و بہ سبو و بہ لغزشِ ہر دم
بہ مستیِ مئے ناب و بہ خاطرِ ہشیار
بہ پوچ گوئیِ بیتابی و بہ بے خوابی
بہ کم زبانیِ صبر و بہ دیدۂ بیدار
بہ دیر و برہمن و کفر و یا صنم گوئی
بہ شیخ و مسجد و تسبیح و رشتۂ زنّار
بہ سیلِ خانہ خراب و بہ وادیِ مجنوں
بہ جرگہ جرگہ غزالاں، بہ دیدۂ خونبار
بہ خوشہ خوشہ سرشک و بہ دار بستِ مژہ
بہ قطرہ قطرہ شراب و بہ جامِ دستِ یار
بہ ضعفِ جسمِ نزار و بہ طاقتِ سرکش
بہ جانِ عاشقِ مسکیں کہ یار پر ہے نثار
بہ خاکِ عاشق بے خانماں کہ بادِ صبا
نہیں دکھاتی اُسے بعدِ مرگ کوچۂ یار
بہ اضطرابِ چراغ و بہ دشمنیِ نسیم
بہ خاطرِ دمِ آخر کہ اُس سے ہے بیزار
بہ دور گردیِ رنگِ قبول و یاسِ دعا
بہ اعتزازِ اجابت، بہ حلقۂ اذکار
بہ خیل خیل خرابی، بہ گوشۂ صحرا
بہ خوش سوادیِ شہر و بہ قریہ و بہ دیار
بہ شوقِ وصلِ نگار و بہ جانِ مایوسی
بہ آرزوئے ہم آغوشی و بہ بختِ کنار
بہ سینہ کوبیِ زخمِ جگر، بہ ماتمِ میر
بہ جاں کنیِ گلوگیر و حسرتِ دیدار
قسم ہے میرے تئیں ان تمام قسموں کی
کہ تجھ کو علم ہے ان سب کا کیا کروں میں شمار
یہ آرزو ہے مرے دل میں مدتوں سے شہا
رہے نہ بعد مرے ہند میں یہ مشتِ غبار
اڑا دے اس کو صبا یاں تلک کہ لے پہونچے
تجھ آستان کے آگے کہ ہے فلک کردار
رہے ہمیشہ ترے دوستوں کے ساتھ اقبال
عدو کو تیرے نہ دے فرصت ایک دم ادبار
(میر تقی میر)
