فصیح اللہ نقیب : حواس و ہوش سنبھالوں تو نعت لکھوں نا

[سید زبیر]

​

حواس و ہوش سنبھالوں تو نعت لکھوں نا​

میں اپنے آپ میں آلوں تو نعت لکھوں نا​

نبی کے ساتھ ، صحابہؓ کو جو رہی نسبت​

میں اس کے رمز کو پالوں تو نعت لکھوں نا​

نبی کے عشق میں ڈوبا ہوا ہو جس کا دل​

اس اہلِ دل کی دعا لوں تو نعت لکھوں نا​

نبی کا لمسِ قدم پانے والے ذرّوں کو​

پلک پلک میں اٹھالوں تو نعت لکھوں نا​

نبی کی شان میں جن شاعروں کی نعتیں ہیں​

میں اُن کے پاﺅں دبا لوں تو نعت لکھوں نا​

​

نبی کے طور ، نبی کے طریقِ احسن پر​

قدم ذرا سے جمالوں تو نعت لکھوں نا​

​

نبی کا چاہ میں مثلِ اویس قرنی میں​

گر اپنے دانت گرالوں تو نعت لکھوں نا​

نبی کی سنت امرو نہی کے سانچے میں​

جو قول و فعل کو ڈھالوں تو نعت لکھوں نا​

نبی کی نعت کی توفیق بھی سعادت بھی​

خدائے پاک سے پالوں تو نعت لکھوں نا​

نقیب! روضہ اطہر کی خاک کے صدقے​

دل و نظر کو اُجالوں تو نعت لکھوں نا​

فصیح اللہ نقیب​

​