فرح جعفری - اِک دولتِ یقین تھی جو اب پاس بھی نہیں

[طارق شاہ]

غزلِ​

فرح جعفری ​

​

اک دولتِ یقین تھی جو، اب پاس بھی نہیں
لیکن یہاں کسی کو یہ احساس بھی نہیں​

​

برسوں سے ہم کھڑےہیں اُسی آئینے کے پاس
وہ آئینہ جو چہرے کا ، عکاس بھی نہیں​

​

رنج والم کی اِس پہ ہے تحریر جا بجا
یہ زندگی، جو صفحۂ قرطاس بھی نہیں ​

​

ہر چند ہم نے مانگیں دُعائیں بہار کی
حالانکہ ہم کو موسمِ گُل راس بھی نہیں ​

​

یادوں کا اک ہجوم ہے کیوں دل کے آس پاس
اب شہرِ دل کے بسنےکی تو آس بھی نہیں ​

​

جانے کہاں گئے وہ حویلی کے سب مکیں
آقا نہیں ، کنیز نہیں ، داس بھی نہیں ​

​

دیکھیں اگر تو پینے کو دریا بھی کم پڑیں
سوچیں فرح تو اتنی ہمیں پیاس بھی نہیں ​

​

فرح جعفری​