طارق شاہ
محفلین
غزل
یہ قول تِرا، یاد ہے اے ساقئ دَوراں !
انگوُر کے اِک بِیج میں سو میکدے پنہاں
انگڑائیاں صُبحوں کی سَرِ عارضِ تاباں
وہ کروَٹیں شاموں کی سرِ کاکُلِ پیچاں
اِن پُتلیوں میں جیسے ہرن مائلِ رَم ہوں
وحشت بھری آنکھیں ہیں کہ اِک دشتِ غزالاں
ہے دار و مدار اہلِ زمانہ کا تجھی پر
تُو قطبِ جہاں، کعبہ دِل، قبلۂ اِیماں
قامت ہے کہ کُہسار پہ چڑھتا ہُوا دِن ہے
جَوبَن ہے، کہ ہے چشمۂ خورشِید میں طوُفاں
سانچے میں ڈھلے شعر ہیں یا عضو بدن کے؟
یہ فکر نمُاں جسم ،سَراسر غَزَلِستاں
ہیں جلوہ دَہِ بزم، پسینے کے یہ قطرے
جسمِ عَرَق آلود سے محِفل ہے چراغاں
اِک شعلۂ بے دُود ہے یا قُلقُلِ مِینا
یہ نغمہ ہے روشن کُنِ تاریکئ دَوراں
آتش کدۂ غیب سے لے آئے ہیں یہ لوگ
پہلو ُمیں ہمارے ہے دلِ شُعلہ بداماں
صد مہر و قمر اِس میں جَھلک جاتے ہیں ساقی !
اِک بُوندِ مئے ناب میں صد عالَمِ اِمکاں
ساقی !تِری آمد کی بشارت ہے شَبِ ماہ
نِکلا وہ نصِیبوں کو جگاتا مہِ تاباں
برحق ہے فِراقؔ، اہلِ طرِیقت کا یہ کہنا !
"یہ مَے غَمِ دُنیا کو بنا دے غَمِ جاناں"
فِراقؔ گورکھپوری