غمِ دوراں ،غمِ جاناں

[جاسمن]

غمِ جاناں بھی گو اِک حادثہ ہے
غمِ دوراں سے فُرصت ہوگئی ہے
عدم

 

[زیرک]

غم دل ہی غمِ دوراں غمِ جانانہ بنتا ہے
یہی غم شعر بنتا ہے، یہی افسانہ بنتا ہے
کلیم عاجز

 

[لاریب مرزا]

ہم بھی کیا سادہ تھے ہم نے بھی سمجھ رکھا تھا
غمِ دوراں سے جدا ہے غمِ جاناں، جاناں!!

احمد فراز

 

[زیرک]

کچھ دیر کسی زلف کے سائے میں ٹھہر جائیں
قابلؔ غمِ دوراں کی ابھی دھوپ کڑی ہے
قابل اجمیری

 

[ام اویس]

غم دوراں نے بھی سیکھے غم جاناں کے چلن
وہی سوچی ہوئی چالیں وہی بے ساختہ پن

وہی اقرار میں انکار کے لاکھوں پہلو
وہی ہونٹوں پہ تبسم وہی ابرو پہ شکن

مصطفٰی زیدی

 

[ام اویس]

کچھ غمِ جاناں کچھ غمِ دوراں دونوں میری ذات کے نام
ایک غزل منسوب ہے اُس سے ایک غزل حالات کے نام

 

[ام اویس]

ذکر ہے اپنا محفل محفل اے غمِ جاناں اے غمِ دوراں
راز نہیں اب حادثہ دل اے غمِ جاناں اے غمِ دوراں

کون سے نغمات خراماں کس پہ چلے رفتار کا جادو
عشق تو ہے پابند سلاسل اے غمِ جاناں اے غمِ دوراں

سوچ سمجھ کر دھوکا کھانا پچھتانا پھر پیار نبھانا
پیار کی ہے یہ کون سی منزل اے غمِ جاناں اے غمِ دوراں

سسک سسک کر صحن چمن میں ہر نغمہ دم توڑ رہا ہے
خوب ہوئی توقیر عنادل اے غمِ جاناں اے غمِ دوراں

دور بھنور کی گود میں جا کر موت کی لوری دینے والے
سر بہ گریباں ہیں لبِ ساحل اے غمِ جاناں اے غمِ دوراں

دھوم تو ہے لیلائے جنوں کی لیکن اذن دید نہیں ہے
تو ہی اٹھا اب پردہ محمل اے غمِ جاناں اے غمِ دوراں

قتیل شفائی

 

[ام اویس]

غم دنیا جو نہ ہو گا غم جاناں ہو گا
گھر اجڑنے کا مرے کوئی تو ساماں ہو گا
پاس غم ، پاس وفا ، پاس جنوں ، پاس حبیب
اور تم عشق کو کہتے تھے کہ آساں ہو گا
ساغر صدیقی

 

[ام اویس]

غم جاناں بھلانے کو غم دوراں کو روتے ہیں
ہمارے اشک بہتے ہیں تو دل کے داغ دھوتے ہیں

حسیب احمد حسیب

 

[ام اویس]

کچھ اور بھی ہیں کام ہمیں اے غم جاناں !
کب تک کوئی الجھی ہوئی زلفوں کو سنوارے

 

[زیرک]

فکرِ معاش، ماتمِ دل، غمِ دنیا، غمِ جاناں
آج سب سے معذرت کہ طبیعت اداس ہے
غالباً عدم جی شعر ہے

 

[محمد عدنان اکبری نقیبی]

اے غم زندگی نہ ہو ناراض
مجھ کو عادت ہے مسکرانے کی

عبدالحمید عدم

 

[زیرک]

اے غم زندگی نہ ہو ناراض
مجھ کو عادت ہے مسکرانے کی
عبدالحمید عدم

موضوع غم دوراں غم جاناں ہے، صرف غم نہیں
غمِ دوراں سے گر ملے فرصت
تیری مسکراہٹ پہ شعر کہنا ہے

 

[زیرک]

نہ جانے کون خوش قسمت غمِ دوراں سے بچ نکلا
درِ زنداں پہ اک ٹوٹی ہوئی زنجیر دیکھی ہے

 

[محمد عدنان اکبری نقیبی]

غم دوراں میں کہاں بات غم جاناں کی
نظم ہے اپنی جگہ خوب مگر ہائے غزل

فضل احمد کریم فضلی

 

[زیرک]

مٹا دیتے زمانے بھر کے غم
غمِ جاناں نے ہر غم میں سنبھالا

 

[زیرک]

سوچ لوں میں بھی علاجِ غمِ جاناں کوئی
غمِ دنیا سے کہو مجھ کو اکیلا چھوڑے

 

[سیما علی]

غم دوراں نے بھی سیکھے غم جاناں کے چلن
وہی سوچی ہوئی چالیں وہی بے ساختہ پن

وہی اقرار میں انکار کے لاکھوں پہلو
وہی ہونٹوں پہ تبسم وہی ابرو پہ شکن

کس کو دیکھا ہے کہ پندار نظر کے با وصف
ایک لمحے کے لیے رک گئی دل کی دھڑکن

کون سی فصل میں اس بار ملے ہیں تجھ سے
کہ نہ پروائے گریباں ہے نہ فکر‌ دامن

اب تو چبھتی ہے ہوا برف کے میدانوں کی
ان دنوں جسم کے احساس سے جلتا تھا بدن

ایسی سونی تو کبھی شام غریباں بھی نہ تھی
دل بجھے جاتے ہیں اے تیرگیٔ صبح وطن

مصطفیٰ زیدی