غزل: کتنے غنچوں نے جان ہاری ہے:ُ: از: محمد حفیظ الرحمٰن

[محمد حفیظ الرحمٰن]

​

غزل​

محمد حفیظ الرحمٰن​

کتنے غنچوں نے جان ہاری ہے​

سارے گلشن پہ سوگ طاری ہے​

شہر کا شہر بن گیا مقتل​

جانے کِس کِس کی آج باری ہے​

شہر کے راستے ہیں سارے بند​

جانے کِس شاہ کی سواری ہے​

اپنی قسمت ہے در بدر پھرنا​

اُن کی قسمت میں شہریاری ہے​

اُن سے ملنا جو اپنے بس میں نہیں​

یاد کرنا تو اختیاری ہے​

آئینہ دیکھ کر ہوا احساس​

وقت کا وار کتنا کاری ہے​

دِل کی کایا پلٹ گئی وہ کِتاب​

کل ہی جو طاق سے اُتاری ہے​

ایک پل جو خدا کی یاد کا ہو​

وہ ہزاروں برس پہ بھاری ہے​

 

[محمد وارث]

خوب غزل ہے جناب حفیظ صاحب، کیا کہنے۔

 

[شاہد شاہنواز]

بہت خوب۔۔۔ ماشا اللہ