غزل: وہ بتِ بیباک گر جلوہ نما ہو جائے گا

[نامعلوم اول]

وہ بتِ بیباک گر جلوہ نما ہو جائے گا
اہلِ دل کہتے ہیں اک محشر بپا ہو جائے گا​

​

گر اسی انداز سے جھکتے رہے صورت پرست
بے تامّل ہر بتِ کافر خدا ہو جائے گا​

​

دل بچا تو ہے فریبِ زلف سے پر خوف ہے
کشتۂِ نیرنگِ چشمِ سرمہ سا ہو جائے گا​

​

اے رقیبِ تنگدل کچھ ہوش کر وہ مہ جبیں
چاہنے سے تیرے کیا مجھ سے خفا ہو جائے گا؟​

​

ہم نشینو حسنِ بے پروا فسوں گر ہے تو ہو
غم بہ فیضِ عاشقی جادو رُبا ہو جائے گا​

​

جب وہ رشکِ گل ادئے ناز سے کھینچے گا تیغ
فرقِ عاشق آپ گردن سے جدا ہو جائے گا​

​

ہر عدو ہے دشمنِ جانِ حزیں اے نازنیں !
تیرے آنے تک نہ جانے کیا سے کیا ہو جائے گا​

​

بے سبب کاملؔ دیارِ عشق میں رکھّا قدم
کیا خبر تھی دل گرفتارِ بلا ہو جائے گا​

 

[مہ جبین]

ہر عدو ہے دشمنِ جانِ حزیں اے نازنیں !
تیرے آنے تک نہ جانے کیا سے کیا ہو جائے گا
کیا بات ہے ، واہ

 

[شیزان]

جب وہ رشکِ گل ادئے ناز سے کھینچے گا تیغ
فرقِ عاشق آپ گردن سے جدا ہو جائے گا

بے سبب کاملؔ دیارِ عشق میں رکھّا قدم
کیا خبر تھی دل گرفتارِ بلا ہو جائے گا


واہ واہ۔۔ کیا بات ہے جی