غزل : خاموشی محبت کی زباں ہے بھی نہیں بھی - وحید اختر

[فرحان محمد خان]

غزل
کیفیتِ دل تم پہ عیاں ہے بھی نہیں بھی
خاموشی محبت کی زباں ہے بھی نہیں بھی

بام و در و دیوار ہی کو گھر نہیں کہتے
تم گھر میں نہیں ہو تو مکاں ہے بھی نہیں بھی

دن آتا ہے شب ڈھلتی ہے کٹتا نہیں پر وقت
ہجراں میں وہی دورِ زماں ہے بھی نہیں بھی

اک گل کی ہوا لے کے چلی ہے سوئے صحرا
فکرِ چمن اندیشۂ جاں ہے بھی نہیں بھی

جب تک ہے وجود اپنا سلاسل ہے مقدر
چلنا ہو تو زنجیر گراں ہے بھی نہیں بھی

ساغر ہے تہی ظرف سمندر کا دیا ہے
ہم پر کرمِ پیرِ مغاں ہے بھی نہیں بھی

ہر سانس کا آغاز ہے ہستی عدم انجام
ہر لمحہ جہانِ گزراں ہے بھی نہیں بھی

یہ آئینہ بن جاتا ہے پتھراو میں فولاد
دل کار گہِ شیشہ گراں ہے بھی نہیں بھی

تم پڑھ کہ سمجھ لو تو یہی قیمتِ فن ہے
مقصودِ سخن دادِ جہاں ہے بھی نہیں بھی

ہیں تشنۂ خوں سیر عطش خوں کا ہے دریا
مقتل میں فرات آج رواں ہے بھی نہیں بھی

معشوق سے سر گوشیوں کا نام غزل ہے
در پردہ حدیثِ دیگراں ہے بھی نہیں بھی ​

وحید اختر​