غزل : جس کو مانا تھا خدا خاک کا پیکر نکلا - وحید اختر

[فرحان محمد خان]

غزل
جس کو مانا تھا خدا خاک کا پیکر نکلا
ہاتھ آیا جو یقیں وہم سراسر نکلا

اک سفر دشتِ خرابی سے سرابوں تک ہے
آنکھ کھولی تو جہاں خواب کا منظر نکلا

کل جہاں ظلم نے کاٹی تھیں سروں کی فصلیں
نم ہوئی ہے تو اسی خاک سے لشکر نکلا

تھی تہی دست ہر اک شاخ خزاں تھی جب تک
فصلِ گل آئی تو ہر شاخ سے خنجر نکلا

خشک آنکھوں سے اٹھی موج تو دنیا ڈوبی
ہم جسے سمجھے تھے صحرا وہ سمندر نکلا

دشتِ بے حاصلیِ عمرِ تمنا کفِ خاک
بحرِ وحشت کے لیے بوند سے کم تر نکلا

دوریاں سنگ کو بھی شمع بنا دیتی ہیں
چُھو کے دیکھا تو جو دل موم تھا پتھر نکلا

زیرِ پا اب نہ زمیں ہے نہ فلک ہے سر پر
سیلِ تخلیق بھی گرداب کا منظر نکلا

گم ہیں جبریل و نبی گم ہیں کتاب و ایماں
آسماں خود بھی خلاؤں کا سمندر نکلا

غمِ انساں کی رسالت پہ ہوئے ہم فائز
اپنی ہی شاخِ سخن پر یہ گلِ تر نکلا

عرش پر آج اترتی ہے زمینوں کی وحی
کرۂ خاک ستاروں سے منور نکلا

ہر پیمبر سے صحیفے کا تقاضا نہ ہوا
حق کا یہ قرض بھی نکلا تو ہمیں پر نکلا

گونج اٹھا نغمۂ کن دشت تمنا میں وحیدؔ
پائے وحشت حدِ امکاں سے جو باہر نکلا ​

وحید اختر
12 مارچ 1976 ء​