غزل برائے اصلاح

[سید تنویر رضا]

محترم الف عین سر

اصلاح کا طالب ہوں

غزل

دیکھا ہے سر بام کسی چاند کو جب سے
مانوس ہوئے جاتے ہیں تاریکی شب سے

بیتاب سدا رہتا ہے یادوں میں کسی کی
امید بھی کیا ہو دل آزار طلب سے

کردار سے اپنے ہے یہ توقیر ہماری
ہم وہ نہیں جو جانے گئے نام و نسب سے

زندہ ہیں تو تکلیف کا احساس ہے لازم
کیوں کھائے بھلا خوف غم و رنج و تعب سے

کرتے ہیں وہی کام جو مرغوب ہو دل کو
قبل اس کے مگر مشورہ کرلیتے ہیں سب سے

ممکن ہے کہاں ہم کو نظر آئے حقیقت
آنکھوں میں سجا رکھے ہیں کچھ خواب عجب سے

شہرہ ہے بہت اپنی فصاحت کا جہاں میں
توہین بھی کرتے ہیں رقیبوں کی ادب سے

ہم ایسے سخنور ہیں کہ تنویر جہاں کو
دیوانہ بنالیتے ہیں یک جنبش لب سے کے

 

[سید تنویر رضا]

سر الف عین
اصلاح کا طالب ہوں

 

[شکیل احمد خان23]

زندہ ہیں تو تکلیف کا احساس ہے لازم
کیوں کھائے بھلا خوف غم و رنج و تعب سے

غالباً ٹائپنگ کی غلطی ہے کہ آپ کھائیں کی جگہ کھائے ٹائپ کرگئے۔۔۔۔۔۔۔۔
کیوں کھائیں بھلا خوف غم و رنج و تعب سے

 

[سید تنویر رضا]

غالباً ٹائپنگ کی غلطی ہے کہ آپ کھائیں کی جگہ کھائے ٹائپ کرگئے۔۔۔۔۔۔۔۔
کیوں کھائیں بھلا خوف غم و رنج و تعب سے

بہت شکریہ ۔۔۔

 

[شکیل احمد خان23]

دیکھا ہے سر بام کسی چاند کو جب سے
مانوس ہوئے جاتے ہیں تاریکی شب سے(آپ نے تاریکئ شب کو مجرد کردیا)
بیتاب سدا رہتا ہے یادوں میں کسی کی۔۔۔۔۔۔۔۔۔۔۔یادوں میں گم ہوجانا ، کھوجانا تو عام ہے یادوں میں بیتاب ہونا کچھ عجیب ہے/یادوں سے کسی کی البتہ قرار چھن جائے
امید بھی کیا ہو دل آزار طلب سے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔تو یہ ممکن ہے اور چل جائے گا۔۔۔۔۔

بیتاب سدا رہتا ہے یادوں سے کسی کی
۔۔۔۔۔۔۔۔۔۔اُمید ہے کیا اِس دلِ آزار طلب کو​

آپ نے تاریکیء شب اور دلِ آزار کو مرکب نہیں غالباًمجرد باندھا ہے یعنی تاریکی۔۔۔۔۔۔۔شب ۔۔۔۔۔۔۔دل۔۔۔۔۔آزار یہ غلط ہے انھیں بطور مرکب باندھناہے
کردار سے اپنے ہے یہ توقیر ہماری۔۔۔۔۔۔۔۔۔۔۔۔۔۔۔۔۔۔۔۔۔کردار سے ہی اپنے ہے توقیر ہماری
ہم وہ نہیں جو جانے گئے نام و نسب سے۔۔۔۔۔جوجانے میں لفظی تنافر ۔۔۔۔۔۔۔۔۔۔۔۔۔ہم وہ نہیں جانے گئے جو نام و نسب سے
زندہ ہیں تو تکلیف کا احساس ہے لازم۔۔۔۔۔۔یہاں بھی تو اور تکلیف کی ت میں ٹکراؤکا عیب۔۔۔۔۔۔۔۔۔زندہ ہیں تو احساس ہے تکلیف کا لازم
کیوں کھائے بھلا خوف غم و رنج و تعب سے۔۔۔۔۔۔۔۔۔۔۔۔۔۔۔کھائیں۔۔۔۔۔۔۔۔۔۔۔۔۔دولخت ہے یہ شعر
۔۔۔۔۔۔۔۔۔۔۔۔۔۔ تکلیف کا احساس ہونا زندگی اور ہوشمندی کی نشانی تو ہے مگر یہ وضاحت تو ہو کہ کس چیز کےغم رنج اور تعب سے
۔۔۔۔۔۔۔۔۔۔۔۔۔۔بے خوفی کا عزم ہے اور یہ عزم کس کا ہے

کیوں کھائے کوئی خوف جدائی کے تعب سے​

کرتے ہیں وہی کام جو مرغوب ہو دل کو۔۔۔۔۔۔۔۔۔۔۔۔کون؟
قبل اس کے مگر مشورہ کرلیتے ہیں سب سے۔۔۔۔۔۔۔۔۔۔پھر وہی سوال کہ کون؟بحرسے خارج ہے
ممکن ہے کہاں ہم کو نظر آئے حقیقت ۔۔۔۔۔کہاں نہیں کہیں لائیں۔۔۔۔۔۔۔۔۔۔ممکن ہے نظر آئے کہیں ہم کو حقیقت/ممکن ہے کہیں ہم کو نظر آئے حقیقت
مگر زیادہ صحیح ’’ ۔۔آجائے ‘‘ کے ساتھ ہے۔۔۔۔۔۔جیسے :۔۔۔۔۔۔شاید نظر آجائے کہیں ہم کو حقیقت
آنکھوں میں سجا رکھے ہیں کچھ خواب عجب سے
شہرہ ہے بہت اپنی فصاحت کا جہاں میں
توہین بھی کرتے ہیں رقیبوں کی ادب سے۔۔۔۔۔۔۔۔۔۔۔۔۔۔۔۔۔۔حریفوں کی ادب سے
ہم ایسے سخنور ہیں کہ تنویر جہاں کو۔۔۔۔۔۔۔۔۔۔۔۔۔۔۔۔۔۔۔۔۔۔تنویر ہم ایسے ہیں سخن ور کہ جہاں کو
دیوانہ بنالیتے ہیں یک جنبش لب سے

 

[شکیل احمد خان23]

مجموعی طور پر اچھی غزل ہے ،ماشاء اللہ !

 

[سید تنویر رضا]

بہت بہت شکریہ ، ممنون و مشکور ہوں ۔

 

[محمد احسن سمیع راحلؔ]

دیکھا ہے سر بام کسی چاند کو جب سے
مانوس ہوئے جاتے ہیں تاریکی شب سے

کس نے دیکھا اور کون مانوس ہوا؟ فاعل اتنا مخفی ہے کہ اس پر آئی ایسا آئی کا ایجنٹ ہونے کا گمان گزرتا ہے
دوسرے یہ کہ چاند کو دیکھنے کے بعد تو روشنی ہونی چاہیے تھی،تاریکی سے انسیت کیونکر ہونے لگی؟

بیتاب سدا رہتا ہے یادوں میں کسی کی
امید بھی کیا ہو دل آزار طلب سے

خیال اچھا ہے لیکن بندش کچھ کمزور لگتی ہے ... برادرم شکیل کا مشورہ مصرع اولی کے لیے مجھے مناسب لگا، لیکن دوسرے مصرعے میں تو انہوں نے ردیف ہی بدل دی! مجھے دوسرا مصرع پہلے کی نسبت بہتر لگا، بس "اور"کی کمی کچھ کھل رہی ہے یعنی کہا جائے کہ اب اور امید بھی کیا رکھی جائے دل آزار طلب سے.
برادرم شکیل کو یہاں ایک مغالطہ ہوا، وہ یہ کہ شاعر نے تاریکئ شب اور دلِ آزار طلب کو کسرۂ اضافت کے ساتھ ہی باندھا ہے بصورت دیگر تو مصرعے بحر سے ہی خارج ہو جائیں گے. ہاں کتابت میں انہوں نے لکھا نہیں، املا کی ایسی غلطیوں سے پرہیز کرنا چاہیے.

کردار سے اپنے ہے یہ توقیر ہماری
ہم وہ نہیں جو جانے گئے نام و نسب سے

شکیل بھائی کا مشورہ مناسب ہے.

زندہ ہیں تو تکلیف کا احساس ہے لازم
کیوں کھائے بھلا خوف غم و رنج و تعب سے

اس شعر کو دوبارہ کہنے کی کوشش کریں، اگرچہ یہ محض تعب کا قافیہ ملانے کی مشق معلوم ہوتا ہے، لیکن ممکن ہے تھوڑی توجہ سے اچھا شعر تخلیق ہو جائے. خیال رہے کہ اس شعر میں بھی فاعل غائب نہیں تو مبھم ضرور ہے. کیوں کھائے کے بجائے کیوں کھائیں ہونا چاہیے.

کرتے ہیں وہی کام جو مرغوب ہو دل کو
قبل اس کے مگر مشورہ کرلیتے ہیں سب سے

کوئی خاص خیال نہیں اس شعر میں. کام یہاں تاثر خراب کر رہا ہے ... اس کے بغیر بیان زیادہ بہتر ہو گا ... مثلا
کرتے ہیں وہی ہم کہ جو مرغوب کو دل کو ... اس طرح فاعل کا ابہام بھی ختم ہو جائے گا.
دوسرے مصرعے کے ناقص الوزن ہونے کا تذکرہ کیا ہے بھائی شکیل نے، مجھے تو وزن میں کوئی مسئلہ محسوس نہیں ہوا. شکیل بھائی اگر وضاحت کرسکیں تو بہتر ہوگا.

ممکن ہے کہاں ہم کو نظر آئے حقیقت
آنکھوں میں سجا رکھے ہیں کچھ خواب عجب سے

اس خیال کی اگر نثر بنائی جائے تو کچھ یوں بنے گی کہ ہمیں حقیقت نظر آئے تو کیسے آئے کہ جب ہم نے اپنی آنکھوں میں کچھ عجیب سے خواب سجا رکھے ہیں.
اب آپ دیکھیں کے آپ کے مصرعوں کی بنت اس مفہوم کا کس حد تک بے غبار ابلاغ کر پا رہی ہے؟ الفاظ کو ذرا آگے پیچھے ہلا جلا کر دیکھیے، بندش زیادہ چست ہوتی ہے کہ نہیں.
شکیل بھائی نے جو صلاح دی ہے، اس سے میری دانست میں تو شعر کا مفہوم بدل جاتا ہے.

شہرہ ہے بہت اپنی فصاحت کا جہاں میں
توہین بھی کرتے ہیں رقیبوں کی ادب سے

دوسرے مصرعے میں جب تک "تو"نہیں آئے گا، بات نہیں بنے گی.

ہم ایسے سخنور ہیں کہ تنویر جہاں کو
دیوانہ بنالیتے ہیں یک جنبش لب سے

کہ کے بعد تخلص لانے سے مصرع خراب ہو رہا ہے... دوبارہ سوچیں.

 

[شکیل احمد خان23]

برادرم شکیل کا مشورہ مصرع اولی کے لیے مجھے مناسب لگا، لیکن دوسرے مصرعے میں تو انہوں نے ردیف ہی بدل دی

جی راحل بھائی واقعی مجھ سے بھول ہوئی میں اِس وقت بھی جب نیا مصرع عروض ڈاٹ کام پر چیک کررہا تھا تو یہ لکھ گیا :ہو اور کیا امید دلِ آزار پسند کو ،نتیجے میں مصرعے کے بحر سے نکل جانے کا اشارہ ملا۔۔۔۔۔۔۔جب یوں لکھا : ہو اور کیا اُمید دلِ آزار طلب سے ۔۔۔۔۔۔۔تو مصرع ٹھیک ہوا،غلطی کے لیے معذرت اور اصلاح کابے حد شکریہ۔اب یہ شعر یوں ہوجائے گا:

بیتاب سدا رہتا ہے یادوں سے کسی کی
۔۔۔۔۔۔۔۔۔۔۔۔اُمید ہو کیا اور دلِ آزار طلب سے​

 

[شکیل احمد خان23]

ممکن ہے کہاں ہم کو نظر آئے حقیقت
آنکھوں میں سجا رکھے ہیں کچھ خواب عجب سے

شکیل بھائی نے جو صلاح دی ہے، اس سے میری دانست میں تو شعر کا مفہوم بدل جاتا ہے.

جی راحل بھائی ،یہاں بھی مجھ سے ایک بار پھر چُوک ہوئی ۔ میں نے شعر کو سرسری سا پڑھ کر محض کہاں کو کہیں سے بدلنے کو دیکھا۔۔۔۔۔اب آپ کے توجہ دلانے پر میں نے شعر کو غور سے دیکھا تو وہی مطلب نکلا جو آپ نے بیان فرمایا۔۔۔۔۔۔۔۔۔شعر میں الفاظ کی نشست تبدیل کرتا ہوں تاکہ دیگر قارئین کو بھی یہی مغالطہ نہ ہو جو مجھے ہوا:

ممکن نہیں آجائے نظر ہم کو حقیقت
۔۔۔۔۔۔۔۔۔۔۔۔۔جب خواب سجا رکھے ہوں آنکھوں نے عجب سے​

 

[شکیل احمد خان23]

شہرہ ہے بہت اپنی فصاحت کا جہاں میں
توہین بھی کرتے ہیں رقیبوں کی ادب سے

پہلے مصرعے میں ہے کو شہرہ سے پہلے لے آئیں تو شہرہ کی ہ اور ہے کی ہ سے تنافرنہ رہے اور جو دعویٰ کیا جارہا ہے اُس پربھی زد نہ پڑے ۔۔۔۔۔۔۔۔
ہے شہرہ بہت اپنی فصاحت کاجہاں میں
توہین بھی کرتے ہیں حریفوں کی ادب سے/توہین بھی کرتے ہیں تو کرتے ہیں ادب سے/

 

[شکیل احمد خان23]

کرتے ہیں وہی کام جو مرغوب ہو دل کو
قبل اس کے مگر مشورہ کرلیتے ہیں سب سے

عروض میں مسئلہ یوں آرہا تھاکہ ۔۔۔۔۔۔کرلیتے ۔۔۔۔۔ملا کر ٹائپ ہوا تھا کاپی کرنے پر عروض نےیہی غلطی پکڑ ی ۔۔۔۔۔جواسپیس دینے سے دور ہوگئی ۔۔۔۔۔۔
کرتے ہیں وہی ہم کہ جو مرغوب ہو دل کو
قبل اس کے مگر مشورہ کرلیتے ہیں سب سے

 

[سید تنویر رضا]

جی راحل بھائی واقعی مجھ سے بھول ہوئی میں اِس وقت بھی جب نیا مصرع عروض ڈاٹ کام پر چیک کررہا تھا تو یہ لکھ گیا :ہو اور کیا امید دلِ آزار پسند کو ،نتیجے میں مصرعے کے بحر سے نکل جانے کا اشارہ ملا۔۔۔۔۔۔۔جب یوں لکھا : ہو اور کیا اُمید دلِ آزار طلب سے ۔۔۔۔۔۔۔تو مصرع ٹھیک ہوا،غلطی کے لیے معذرت اور اصلاح کابے حد شکریہ۔اب یہ شعر یوں ہوجائے گا:

بیتاب سدا رہتا ہے یادوں سے کسی کی
۔۔۔۔۔۔۔۔۔۔۔۔اُمید ہو کیا اور دلِ آزار طلب سے​

بہت شکریہ محترم ،