غزل برائے اصلاح

[فیضان قیصر]

بے سند بات جب کسی نے کی
اس کی تردید آ گہی نے کی

متحیر ہیں تیرگی والے
چوٹ ان سے یوں روشنی نے کی

راستے میں ہی کھو گئے وہ سب
رہبری جن کی مولوی نے کی

مجھ کو اپنا بنا لیا تم نے
یہ کرامت بھی بس تمھی نے کی

اس سے بڑھ کر تضاد کیا ہوگا
بھوک پر گفتگو غنی نے کی

مخبری سب سے حالِ دل کی مرے
میری بے طور خامشی نے کی

میں نے تنہائی کو چنا فیضان
پیش جب دوستی کسی نے کی

 

[فیضان قیصر]

الف عین سر

 

[محمد احسن سمیع راحلؔ]

اچھی غزل ہے فیضان بھائی، ماشاء اللہ.
بس مطلع باقی غزل کے معیار کا نہیں لگا. کچھ اور فکر کرکے دیکھیں.
دوسرے شعر کے مصرعہ ثانی میں "چوٹ ان سے" کو "چوٹ ان پر" کر لیں کیونکہ محاورے کے مطابق چوٹ کسی شے پر لگائی جاتی ہے.
اس کے علاوہ دو ایک مقامات پر تنافر کی کیفیت ہے، اس کو بھی دیکھ لیجئے.

 

[الف عین]

راحل سے متفق ہوں میں بھی

 

[فیضان قیصر]

اچھی غزل ہے فیضان بھائی، ماشاء اللہ.
بس مطلع باقی غزل کے معیار کا نہیں لگا. کچھ اور فکر کرکے دیکھیں.
دوسرے شعر کے مصرعہ ثانی میں "چوٹ ان سے" کو "چوٹ ان پر" کر لیں کیونکہ محاورے کے مطابق چوٹ کسی شے پر لگائی جاتی ہے.
اس کے علاوہ دو ایک مقامات پر تنافر کی کیفیت ہے، اس کو بھی دیکھ لیجئے.

بہت شکریہ راحل بھائی، ٹھیک کہتے ہیں، تین دن ہوگئے تھے اور مطلع ہو نہیں پا رہا تھا، موجودہ مطلع سے میرا بھی دل مطمئن نہیں تھا، آپ لوگوں کے آگے یوں پیش کردیا کہ کبھی کبھار آپ لوگوں کے مشورے سے کوئی راہ نکل آتی ہے، بہرحال میں اس کی طرف توجہ کرتا ہوں، کیا ہی اچھا ہوتا آپ ان تنافر والے مقامات کی بابت بھی رہنمائی فرمادیتے، آسان ہوجاتا میرے لیے- ایک بار پھر بہت شکریہ

ایک جو مجھے سمجھ آیا ہے وہ
یہ کرامت بھی بس تمھی نے کی میں بھی اور بس تنافر پیدا کررہے ہیں

 

[فیضان قیصر]

راحل سے متفق ہوں میں بھی

بہت شکریہ سر

 

[محمد احسن سمیع راحلؔ]

ایک جو مجھے سمجھ آیا ہے وہ
یہ کرامت بھی بس تمھی نے کی میں بھی اور بس تنافر پیدا کررہے ہیں

جی، آپ صحیح پہچانے. باقی دو جگہوں پر قافیہ اور ردیف متنفر ہو رہے ہیں، روشنی اور غنی، مگر اس کو ایسے بھی چھوڑا جاسکتا ہے کیونکہ دونوں ی مکمل ادا ہورہی ہے. اگر کوئی متبادل قافیہ ذہن میں ہو تو فکر کر کے دیکھ سکتے ہیں.

 

[فیضان قیصر]

آہ و فریاد مفلسی نے کی
گفتگو اس سے جب خوشی نے کی


اس مطلع کے بارے میں کیا خیال ہے

الف عین سر
سمیع راحل بھائی

 

[فیضان قیصر]

جی، آپ صحیح پہچانے. باقی دو جگہوں پر قافیہ اور ردیف متنفر ہو رہے ہیں، روشنی اور غنی، مگر اس کو ایسے بھی چھوڑا جاسکتا ہے کیونکہ دونوں ی مکمل ادا ہورہی ہے. اگر کوئی متبادل قافیہ ذہن میں ہو تو فکر کر کے دیکھ سکتے ہیں.

مجھ کو اپنا بنا لیا تم نے
یہ کرامت فقط تمھی نے کی

 

[الف عین]

نیا مطلع بہتر ہے، دوسرا شعر بھی درست ہو گیا