غزل۔۔۔ہر بات پہ پیارے ہمیں غصہ نہیں آتا۔۔مولانا مشرف علی تھانوی

[متلاشی]

ہر بات پہ پیارے ہمیں غصہ نہیں آتا
لیکن اگر آتا ہے تو بے جا نہیں آتا
دل ،دل سے دیا ہے انہیں کس طرح بتاؤں
اظہارِ محبت کا طریقہ نہیں آتا
اب غیر سمجھنا ہے فریبِ نظر ان کا
ہیں دل سے فدا ہم کو دکھاوا نہیں آتا
کس طرح بیاں کیجئے اسرارِ محبت
محفل میں نظر کوئی بھی اپنا نہیں آتا
فیض درِ میخانہ بہت عام ہے ساقی
اس در پہ کوئی جا کے پیاسا نہیں آتا
کہتے ہیں کہ خود پیرِ بلا نوش ہے ساقی
میخانہ میں شاید کوئی مجھ سا نہیں آتا
توبہ مری میخانہ میں خود کہتی ہے مجھ سے
جا پی لے یہاں کوئی فرشتہ نہیں آتا
رہتا ہے رقیبوں کے جھمیلے میں وہ کافر
آتا ہے تصور میں تو تنہا نہیں آتا
ہر لحظہ غنیمت ہے تری زیست کا عارف
جو وقت گزرتا ہے دوبارہ نہیں آتا
( مولانا مشرف علی تھانوی)