عیداں ہَووَن یا شب راتاں سانُوں کیہہ ۔عبیر ابوذری

[فرخ منظور]

عیداں ہَووَن یا شب راتاں سانُوں کیہہ
چھَڈّو جی ایہہ گَلاّں بَاتاں سانُوں کیہہ

دَسَّو کاہدے نال منائیے عِیداں نُوں
کیہڑی خوشی چہ نغمے گائیے عِیداں نُوں
کِتھَّوں پَائیے پِئے کھائیے عِیداں نُوں
کاہدے اُتّے ختم دَوائیے عِیداں نُوں

چَاہڑن دیگاں بھَرن پراتاں سانُوں کیہہ
چھَڈّو جی ایہہ گَلاّں بَاتاں سانُوں کیہہ

باہر دیاں جے ایڈاں نیں تے وَڈیاں لئی
ملک دیاں‌ جے بھیڈاں نیں تے وَڈیاں لئی
پُٹھّیاں سِدّیاں کھیڈاں نیں تے وَڈیاں لئی
لیبر دیاں پریڈاں نیں تے وَڈیاں لئی

وَڈیاں لئی نیں رُو رعائتاں سانُوں کیہہ
چھَڈّو جی ایہہ گَلاّں بَاتاں سانُوں کیہہ

مَانن بنگلے باراں دریاں سانوں کیہہ
وَرتن چِیزاں کھَرّیاں کھَرّیاں سانوں کیہہ
پہنن پَٹ ہنڈاون زَرّیاں سانوں کیہہ
ڈیناں بَن بَن بیٹھن پَریاں سانوں کیہہ

بھَانویں بَاندر پَون بَناتاں سانوں کیہہ
چھَڈّو جی ایہہ گَلاّں بَاتاں سانُوں کیہہ

پھِردے کاراں‌ تَے امپورٹر مَوجَاں نال
چور سمگلر جھُوٹن موٹر مَوجَاں نال
کَرن اٹینڈ کلبّاں ہوٹر مَوجَاں نال
ڈِھڈل مُوٹُو گنجے ٹوٹر مَوجَاں نال

دِنّے دوپہرے مانن راتاں سانوں کیہہ
چھَڈّو جی ایہہ گَلاّں بَاتاں سانُوں کیہہ

گَلاّں بَاتاں نال عبیرا فیدہ کِی
وَگدے ہوئے ناسُور تے چِیرا فیدہ کِی
دَسّن نال سٹور ذخیرہ فیدہ کِی
اَنّھیاں اکھّاں وِچ ممیرہ فیدہ کی

مُردہ ہندیاں جَان حیاتاں سانوں کیہہ
چھَڈّو جی ایہہ گَلاّں بَاتاں سانُوں کیہہ
(بابا عبیر ابوذری)​

 

[جاسمن]

واہ واہ!
بڑیاں کوڑیاں حقیقتاں دس گئے نیں بابا جی۔
بہت سوہنی نظم اے۔

 

[لاريب اخلاص]

خوب صورت نظم!