شہسَوار - وقار انبالوی

[کاشفی]

شہسَوار​

(وقار انبالوی)​

​

وہ آئے جب سوارِ تو سنِ ناز​

قیامت ہم رکاب آئے نہ آئے؟​

(داغ دہلوی)​

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔​

​

گُلستانِ وفا کا رنگ پرداز ​

پرستانِ ادا کا ناوک انداز​

​

شبستانِ حیا کی شمعِ روشن​

نیستانِ طرب کا زمزمہ ساز​

​

نگارستانِ دل کا نقشِ رنگیں​

بہارِ آرزو کا رنگِ اعجاز​

​

فروغِ بزمِ عشرت جس کے جلوے​

بہارِ باغِ الفت جس کے انداز​

​

لب اُس کے ترجمانِ رازِ الفت​

نگاہیں آرزوئے دل کی غمّاز​

​

جبیں رنگینیء قُدرت کا نقشہ​

تو قد رعنائی فطرت کی پرواز​

​

کہانی جس کے آگے حُورِ جنّت​

فسانہ جس کے آگے تُرکِ شیراز​

​

شباب و نُور و نکہت کا سراپا​

جنون پرور، ستم انگیز، طنّاز​

​

یگانہ شہسوار عرصہءِ حُسن​

"وہ آئے جب سوارِ تو سنِ ناز​

​

قیامت ہم رکاب آئے نہ آئے؟"​

​

​

​

 

[محمد وارث]

بہت شکریہ کاشفی صاحب شیئر کرنے کیلیے۔