شعر و شاعر (اشعار اور خالق)

[طارق شاہ]

اب اُن کے طرز و عمل سے ہَمَیں ذرا بھی خلؔش
رہے تھے شیر و شکر کا پتہ نہیں چلتا

شفیق خلؔش

 

[طارق شاہ]

میں اُس کے جھوُٹ کے صدقے، میں سچ کہوں محسنؔ
مُجھے عزیز ہے کتنا بہانہ جُو میرا

محسنؔ نقوی

 

[طارق شاہ]

تیرے ہر مشورے کو، اے ناصح !
آج پھر یادِ یار لے ڈُوبی

خُمار بارہ بنْکوی

 

[طارق شاہ]

چار دِن کا ہی ساتھ تھا، لیکن
زندگی، اے خُمار! لے ڈُوبی

خُمار بارہ بنْکوی

 

[طارق شاہ]

یہ سیہ دِل صُورتِ گیسو نہ ہوگا رُو سفید
خال وہ ہندو نہیں جس کو مسلماں کیجیے

خواجہ حید علی آتؔش

 

[طارق شاہ]

بس ایک موتی سی چَھب دِکھا کر، بس ایک میٹھی سی دُھن سنا کر
ستارۂ شام بن کے آیا ، برنگِ خوابِ سَحر گیا وہ

خوشی کی رُت ہو، کہ غم کا موسم، نظر اُسے ڈھونڈتی ہے ہر دم
وہ بُوئے گُل تھا کہ نغمۂ جاں، مِرے تو دِل میں اُتر گیا وہ

ناصؔر کاظمی

 

[طارق شاہ]

ہم نے ہر غم سے نِکھاری ہیں تمہاری یادیں
ہم! کوئی تم تھے ،کہ وابستۂ غم ہو جاتے

احمد ندیؔم قاسمی

 

[طارق شاہ]

شرما کے اِک نے اوڑھی، منہ پر ہنسی کے مارے
رنگین اوڑھنی کے بِھیگے ہُوئے کِنارے

شرم و حَیا کی سُرخی چہرے پہ چھا رہی ہے
شام اُس کو دیکھتی ہے اور مُسکرا رہی ہے

ابوالاثرحفیظ جالندھری

 

[طارق شاہ]

سوچا تھا! غم کو غم کاٹے، زہر کا زہر بنے تریاق
اب دِل آبلہ آبلہ ہے، اور شیشۂ جاں زہراب بھرا

احمد فرؔاز

 

[طارق شاہ]

ہم بھی شب گیسو کے اُجالوں میں رہے ہیں
کیا کیجیے دِن پھیر کے لائے نہیں جاتے

اے ہوش! غمِ دِل کی چراغوں کی ہے کیا بات
اک بار جلا دو ، تو بُھجائے نہیں جاتے
ہوش ترمذی
(سیّد سبط ِحَسن)

 

[طارق شاہ]

کِس قدر نا آشنا تھےمیری قسمت سے حفیظؔ
کرگئے جو وضع رسمِ عاشقی میرے لیے

حفیظؔ جالندھری

 

[طارق شاہ]

اے روشنیِ طبع! تو برمَن بَلا شُدی
پھر یہ نہیں تو کھا گئی کِس کی نظر مجھے

حفیظؔ جالندھری

 

[طارق شاہ]

ساتواں رنگ

بال کالے، سفید برف سے گال
چاند سا جسم، کوٹ بادل کا
لہریا آستین، سُرخ بٹن
کچھ بھلا سا تھا رنگ آنچل کا
اب کے آئے ، تو یہ اِرادہ ہے !
دونوں آنکھوں سے اُس کو دیکھوں گا

ناصؔر کاظمی

 

[طارق شاہ]

بے زبانی ترجمانِ شوقِ بے حد ہو تو ہو !
ورنہ پیشِ یار کام آتی ہیں تقریریں کہیں

حسرؔت موہانی

 

[طارق شاہ]

شب وہی شب ہے، دِن وہی دِن ہیں !
جو ، تِری یاد میں گُزر جائیں

حسرؔت موہانی

 

[محمدابوعبداللہ]

شرما کے اِک نے اوڑھی، منہ پر ہنسی کے مارے
رنگین اوڑھنی کے بِھیگے ہُوئے کِنارے

شرم و حَیا کی سُرخی چہرے پہ چھا رہی ہے
شام اُس کو دیکھتی ہے اور مُسکرا رہی ہے

ابوالاثرحفیظ جالندھری

سبحان اللہ

 

[طارق شاہ]

کیا دھرا سب سامنے آئے
میں پہلے سے دیکھ رہا تھا

فراؔق گورکھپوری

 

[محمدابوعبداللہ]

کیا دھرا سب سامنے آئے
میں پہلے سے دیکھ رہا تھا

فراؔق گورکھپوری

سمجھ ہی نہیں آئی

 

[طارق شاہ]

عجب انداز ہے، میرے مزاجِ لا اُبالی کا !
نہ ممنُونِ تمنّا ہُوں، نہ مُشتاقِ مُسرّت ہُوں

حسرؔت موہانی

 

[طارق شاہ]

سمجھ ہی نہیں آئی

کیا(قسمت کا) دھرا سب سامنے آئے
میں پہلے سے۔۔۔۔۔۔۔۔۔۔۔۔۔۔


کیا(کِیا) دھرا سب سامنے آئے
میں پہلے سے۔۔۔۔۔۔۔۔۔۔۔۔۔۔



کیا(اُن کا) دھرا سب سامنے آئے
میں پہلے سے۔۔۔۔۔۔۔۔۔۔۔۔۔۔