سیماب اکبرآبادی -- اب کیا بتائیں عمرِ وفا کیوں خراب کی

[طارق شاہ]

غزل ​

سیماب اکبرآبادی​

​

اب کیا بتائیں عمرِ وفا کیوں خراب کی ​

نوحہ ہے زندگی کا کہانی شباب کی​

​

تم نے خبر نہ لی مِرے حالِ خراب کی ​

کالی ہوئیں فراق میں راتیں شباب کی​

​

تھی الوداعِ ہوشِ تجلّئِ مختصر ​

میرا تو کام کرگئی جنْبش نقاب کی​

​

وہ میرے ساتھ ساتھ مُجسّم تِرا خیال​

وہ جنگلوں میں سیر شبِ ماہتاب کی​

​

ممنُون ہوں تِری نگۂِ بے نیاز کا​

رُسوائیاں تو ہیں مِرے حالِ خراب کی​

​

میں اپنی جلوہ گاہِ تصوّر سجاؤں گا ​

تصویرکھینچ دے کوئی اُن کے شباب کی​

​

دیدو غبارِ دل میں ذرا سی جگہ ہمیں ​

تربت بنائیں گے دلِ خانہ خراب کی​

​

گھبرا کے جس سے چیخ اُٹھا عالَمِ وجُود ​

وہ چیز دل نے میرے لئے اِنتخاب کی​

​

چمکیں تو خوفناک، گِرَیں تو حیات سوز ​

ساون کی بجلیاں ہیں نگاہیں عتاب کی​

​

سیماب زندگی کی ہے تاریخ ہرغزل ​

ہرشعرمیں ہے ایک کہانی شباب کی ​

​

علامہ سیماب اکبرآبادی​

 

[سید زبیر]

بہت خوب طارق شاہ !
چمکیں تو خوفناک، گِرَیں تو حیات سوز
ساون کی بجلیاں ہیں نگاہیں عتاب کی
کیا بات ہے

 

[طارق شاہ]

بہت خوب طارق شاہ !
چمکیں تو خوفناک، گِرَیں تو حیات سوز
ساون کی بجلیاں ہیں نگاہیں عتاب کی
کیا بات ہے

متشکّر ہوں، اِس اظہارِ خیال اور پذیرائیِ انتخاب پر
بہت شاداں رہیں صاحب