سوالِ صبحِ چمن ظلمتِ خزاں سے اٹھا ۔ صہبا اختر

فرخ منظور

لائبریرین
سوالِ صبحِ چمن ظلمتِ خزاں سے اٹھا
یہ نفع کم تو نہیں ہے جو اس زیاں سے اٹھا

سفینہ رانیِ مہتاب دیکھتا کوئی
کہ اک تلاطمِ ضو جوئے کہکشاں سے اٹھا

غبارِ ماہ کہ مقسوم تھا خلاؤں کا
بکھر گیا تو ترے سنگِ آستاں سے اٹھا

غمِ زمانہ ترے ناز کیا اٹھاؤں گا
کہ نازِ دوست بھی کم مجھ سے سرگراں سے اٹھا

مرے حبیب بہت کم ثبات ہے دنیا
مرے حبیب بس اب ہاتھ امتحاں سے اٹھا

بیانِ لغزشِ آدم نہ کر کہ وہ فتنہ
مری زمیں سے نہیں تیرے آسماں سے اٹھا

کہاں چلے ہو لیے نقدِ جان و دل صہباؔ
کہ کاروبارِ وفا شہرِ دلبراں سے اٹھا

(صہباؔ اختر)
 
Top