سلام از-ناصرؔ کاظمی:::: لہو لہو ہے زبانِ قلم بیاں کے لیے:::: Nasir Kazmi

[طارق شاہ]

سلام
۔
لہو لہو ہے زبانِ قلم بیاں کے لیے
یہ گُل چنے ہیں شہیدوں کی داستاں کے لیے

کھڑے ہیں شاہ کمر بستہ اِمتحاں کے لیے
پِھر ایسی رات کب آئے گی آسماں کے لیے

دِیا بُجھا کے یہ کہتے تھے ساتھیوں سے حُسینؑ
جو چاہو، ڈھونڈ لو رستا کوئی اماں کے کیے

کہا یہ سُن کے رفیقوں نے یک زباں ہو کر !
یہ جاں تو وقف ہےمولائے انس و جاں کے لئے

ہَمَیں تو منزلِ آخر ہے آستانِ حُسینؑ
یہ سر جھُکے گا نہ اب اور آستاں کے لیے

سِتارے ڈُوب گئے، وقت ڈھونڈتا ہے پناہ!
کڑی ہے آج کی شب دَورِ آسماں کے لیے

گواہی باقی ہے اضغرؑ کی لے چلے ہیں حُسینؑ
ورق اِک اور بھی ہے زیبِ داستاں کے لیے

لُٹا ہے دشتِ غریبی میں کارواں کِس کا
کہ خاک اُڑاتی ہے منزِل بھی کارواں کے لیے

کہاں کہاں نہ لُٹا، کاروانِ آلِ نبیؐ
فلک نے ہم سے یہ بدلے کہاں کہاں کے لیے

یہ دشتِ کرب و بَلا ہے جنابِ خضر! یہاں
ہے شرطِ تشنہ لَبی عُمرِ جاوِداں کے لیے

بہے ہیں کِس قدر آنسو، چُھپے ہیں کتنے ہی داغ
یہ جمع و خرچ ہیں باقی حساب داں کے لیے

سکُوتِ اہلِ سُخن بھی ہے ایک طرزِ سُخن
یہ نُکتہ چھوڑ دِیا مَیں نے نکتہ داں کے لیے

سُخن کی تاب کہاں اب، کہ دِل ہے خُوں ناصرؔ
زبانِ تِیر چَلی ایک بے زباں کے لیے

ناصرؔ کاظمی
​