زہر پیالہ : شفیع عقیل دی پنجابی نظماں

[الف نظامی]

لوکیں جَھلّے
میرے دُکھ تے تیریاں خوشیاں
اَکھراں وِچ نہ آوندے
لوکیں جَھلّے کُجھ ناں جانݨ
فیر وی باتاں پاوندے

 

[الف نظامی]

عمر سفر
عُمر سفر وِچ ناں مِتراں دے
اِنج پئے بُھلدے جاندے
جیویں رُکھوں سُکّے پَتّر
آپے ڈِگدے جاندے

 

[الف نظامی]

اوکڑ ویلا
شہر وی سُنّے ، بَݨ وی سُنّے
دونوَاں توں ڈر آوے
اِک پرچھانواں نال اے میرے
او وی ناں چَھڈّ جاوے

 

[الف نظامی]

کَلّا سفر
کَلیاں جاندے راہ وی تَھکدے
نال کھَڑن پرچھَاویں
تُوں کیوں کَلّا سفر تے ٹُریا
فیر پَرت نہ آویں

 

[الف نظامی]

آپݨے دُکھ وِچ
بَلدی اَگ جَد راتیں ویکھاں
مَینوں اِسراں جاپے
جیویں گھُپ ہنیرا سَڑدا
آپݨے دُکھ وِچ آپے

 

[الف نظامی]

گُذری رُت دی قبر
پت جَھڑ وِچ جَد پتّے ڈِگدے
رُکھ اِنج نظرِیں آوندے
گُذری رُت دی قبر تے جیویں
رو رو پھُل ورساوندے

 

[الف نظامی]

بُرج
وَدھ وَدھ اَمبراں دے وَل ویکھے
مَینوں ایہہ ڈر آوے
دھرتی توں جو اُچّا ہووے
اوہو ای ڈھے جاوے

 

[الف نظامی]

اِک کُڑی نُوں
جاوَن والے وات نہ پُچھدے
توں کیوں اَونسیاں* پاویں
دُجیاں کولوں وِچھڑ گئی ایں
خود توں وی ناں جاویں


* اَونسی:

/noun, feminine/
a superstitious way of guessing success or failure,
fulfillment or belying of hope by drawing a series of lines on the ground without count and then canceling them in certain order, an exact multiple indicating success​

 

[الف نظامی]

رات ویلے
چُپ دے ڈَنگے ، سہمے پنچھی
جاگݨ ٹہنیاں اُتّے
اِک دُوجے نُوں ویکھ کے سوچݨ
رُکھ کیوں گھُوکیں سُتّے؟

 

[الف نظامی]

ذات دی دلدل
دھرتی ، ساگر ، ٹَپّ کے لوکیں
تاریاں وِچ کھلوئے
آپݨی ذات دی دلدل دے وِچ
لَک لَک کُھبّے ہوئے

 

[الف نظامی]

کتاب
ایہو کتاباں ذہن دے بُوہے
پل وچ کھوہل وکھاوَن
ایہو آپݨے حرفاں راھیں
سوچِیں (سوچ-ایں) سَنگل پاون

 

[الف نظامی]

کیکٹس
جیوَن تھَل وِچ تُوں میں دونویں
کیکٹس اُگّے ہوئے
بَدّل ، پاݨی ، سبزہ ، کوئی نہ
فیر وی ویکھ نہ موئے

 

[الف نظامی]

گھیرے
سجناں وِچّ میں گھِریا ہویا
کیہڑے پاسے جاواں
جیہڑے وَیری آپ گوائے
اوہناں لئی پچھتاواں

 

[الف نظامی]

دن دا جنگل
صدیاں توں میں سفر تے ٹُریا
پَل پَل وَرھے دا لگّے
دن دا جنگل پار کراں تے
رات سمندر اَگّے

 

[الف نظامی]

کُڑیئے!
کیہڑے شہروں آئی ایں تُوں
کیہڑے شہر ای جانا؟
وِنگیاں ، ڈنگیاں ، پکّیاں ، راہوَاں
مُڑ مُڑ بھُلیں پانا

 

[الف نظامی]

آس بھُلاوا
سُفنہ سی یا آس بھُلاوا
عمر گزاری ساری
تُسیں نصیباں والے لوکو
اسیں تے بازی ہاری

 

[الف نظامی]

گُنجھل دھاگے
سوچ دے دھاگے گُنجھلاں پَیّاں
کُجھ وی سمجھ نہ آوے
جیوں جیوں گنڈھاں کھولدا جاواں
دھاگہ ٹُٹدا جاوے

 

[الف نظامی]

جھُوٹھ تے سچ
یاری دے کئی رُوپ میں ویکھاں
نِت ایہہ سانگ رچاوے
دشمن دا اِک رُوپ او سچا
اوہو نظریں آوے

 

[الف نظامی]

گُجھی سوچ
رُوپ جوانی جد تک ہوون
وقت کھلوتا لگدا
عمر ڈھلے تے وَرھا شتابی
پل پل دے وِچ لنگھدا

 

[الف نظامی]

یاداں دے ڈھنگ
نیلے ، پیلے ، لال تے چِٹّے
پھُلّاں دے کئی رنگ
وِچھڑے لوک کدی نال بھُلدے
یاداں دے کئی ڈھنگ