دربار اکبری - شورش کاشمیری

ابوشامل

محفلین
مرحوم آغا شورش کاشمیری نے اپنے رسالے ‘چٹان’ میں ‘دربار اکبری’ کے زیر عنوان ایک نثری فیچر لکھا تھا جس میں یہ بتایا گیا کہ جنرل ایوب خاں کی درباری مخلوق کس طرح کورنش بجا لاتی ہے اور وہ جواب میں کیا ارشاد فرماتے ہیں۔ فیچر سے ایوب خاں اتنے برافروختہ ہوئے کہ اس وقت کے وزیر قانون غلام نبی میمن اور ایڈوکیٹ جنرل سید ناصر حسین شاہ کو گورنمنٹ ہاؤس بلوا کر سخت جھڑکیاں دیں۔ ساتھ ہی فرمایا “ابھی تک یہ شخص باہر کیوں ہے، اس کا اخبار کس لیے جاری ہے؟ میں سپاہی ہوں اور سپاہی فیلڈ میں دشمن کو برداشت نہیں کیا کرتا”

اس کے بعد مدیر چٹان دھر لیے گئے ۔۔۔۔ فوراً بعد میمن صاحب رخصت ہوگئے۔ سید ناصر شاہ بھی نکال دیے گئے۔ ملک امیر محمد خاں کو بھی جانا پڑا۔ یہ سب عزت سے گئے لیکن رسوائی اور پسپائی کا جو الاؤ ایوب خاں کے لیے روشن ہوا، وہ ایسا عبرت ناک سبق ہے کہ پاکستان کی کئی نسلیں اسے بھول نہیں سکتیں۔ ذیل کی نظم ایوب خاں کے عہد کی جان کنی کا منظر پیش کرتی ہے اور اگر آج کے حالات پر اسے منطبق کیا جائے تو زیادہ تفاوت نظر نہیں آتا۔

مصاحبین
حضور ہم دس برس سے حاشیہ بردار اولٰی ہیں
عمومی شور و غل شہروں کی دیرینہ طبیعت ہے
سیاسی کھیل ہیں، شوریدہ سر ہلڑ مچاتے ہیں
انہیں لیڈر نچاتے ہیں
ہمیں آنکھیں دکھاتے ہیں
اگر ہم جیل بھجوائیں
تو اکثر تلملاتے ہیں
حضور! ہم خانہ زادِ سلطنت سجدے لٹاتے ہیں

شاہ

بکو مت چپ رہو، آغازِ بد انجام پر سوچو
یہاں کیا ہو رہا ہے، کون سا شیطان اٹھا ہے
جھروکے سے اُدھر دیکھو، یہ کیا طوفاں اٹھا ہے
دمادم، پے بہ پے ایوب مردہ باد کے نعرے؟
افق پر بے تحاشا جھلملاتی شام کے تارے
گرجتے گونجتے الفاظ میں تقریر کے پارے
بکو مت، چپ رہو، آغازِ بد انجام پر سوچو

(ایک اور مصاحب داخل ہو کر آداب بجا لاتا ہے)
مصاحب


امیر المومنیں! بالی عمریا کا وزیر آیا
بہتر نشتروں میں ایک نشتر میر صاحب کا
بہ قول آنجہانی شیخ، چہرہ ماہتابی ہے
طبیعت آفتابی ہے
خدا جانے؟ سنا ہے
بچپنے ہی سے شرابی ہے

شاہ
بلا لاؤ، اکیلا ہے
کہ کوئی دوسرا بھی ہے؟

مصاحب
جماعت کے بہت سے منچلے بھی ساتھ آئے ہیں
غزلہائے ہفت خواں کے ولولے بھی ساتھ آئے ہیں
جوانی ناگنوں کے رنگ میں آواز دیتی ہے
دل سد رہ نشیں کو طاقت پرواز دیتی ہے
(بالی عمریا کا وزیر دربار میں داخل ہو کر قدم بوس ہوتا ہے)

شاہ
چپڑ غٹو، الل ٹپو، نکھٹو، دًم کٹے ٹٹو
فضا لاہور کی ہنگامہ پرور ہوتی جاتی ہے
کہاں ہو؟ کس طرف ہو؟ دیکھتے کیا ہو میاں لٹو!
جماعت کی صدارت اس لیے تم کو عطا کی ہے
عوام الناس بازاروں میں نعرہ باز ہو جائیں
سیاسی مسخرے اس دور کے شہباز ہوجائیں
ارے گھسیٹے، ارے بچھیے کے باوا
سوچتا کیا ہے؟

وزیر
امیر المومنیں!۔۔۔۔ ہم بندگانِ خاص کے آقا
ہم ایسے سینکڑوں سرکارِ عالی پر نچھاور ہیں
یقیں کیجیے، حریفوں کے مقابل میں دلاور ہیں
جری ہیں، جانتے ہیں بچپنے سے جاننے والے
کہ ہم ہیں آپکو ظلِ الٰہی ماننے والے
مرے قبلہ، مرے آقا، مرے مولا، مرے محسن
سوائے چند اوباشوں کے، ساری قوم خادم ہے
سیاسی نٹ کھٹوں کی گرم گفتاری پر نادم ہے

شاہ
بکو مت، چپ رہو، یہ ہم سمجھتے ہیں یہاں کیا ہے
وہ مودودی کے فتنے اور نصر اللہ کے شوشے
وہ پاکستان مسلم لیگ کے بھڑکے ہوئے گوشے
ڈیورنڈ روڈ کا وہ شاطرِ اعظم، معاذ اللہ
کوئی ٹکرائے اس شہباز سے، یہ تاب ہے کس میں؟
کوئی ایسا بھی ہے، یہ جوہرِ نایاب ہے کس میں؟
وہ کائیاں چودھری یعنی وزیراعظم سابق
پڑا ہے لٹھ لیے پیچھے مرے اور ضرب ہے کاری
تمہیں معلوم ہے عبد الولی خاں کی سیہ کاری؟
وہ بھٹو، جو مجھے کہتا تھا ڈیڈی، اب کہاں پر ہے
کہ سخت گفتنی نا گفتنی اس کی زباں پر ہے
وہ شورش جس نے بھوک ہڑتال سے لرزا دیا سب کو
تمہیں معلوم ہے بد بخت نے تڑپا دیا سب کو
قصوری اور شوکت کس لیے آزاد پھرتے ہیں
انہیں زنداں میں ڈلواؤ، دار پر کھنچواؤ، مرواؤ
ہمارا حکم ہے ان سب کے خنجر گھونپتے جاؤ
جسارت اس قدر؟ اب گالیاں دینے پہ اترے ہیں
سیاسی نٹ کھٹوں کے بیچ بازاریوں کے نخرے ہیں

(کچھ دیر چپ رہنے کے بعد حکومت کی ایک رقاصہ سے)
شاہ


اری نازک بدن، زہرہ ادا، گوہر صفت لیلی
ترے قربان، بوڑھی ہڈیوں میں جان آ جائے
رخِ زیبا پہ غازہ ہے مگر سی آئی اے کا ہے
کوئی داؤ بتا، یہ بے تکا طوفان تھم جائے
ہمارا پاؤں اکھڑا جا رہا ہے پھر سے جم جائے
بتا نور جہاں، نورِ نظر، رقاصۂ عالم
ہماری ذات اقدس سے عوام الناس ہیں برہم

رقاصہ
مرے آقا! اجازت ہو تو میری بات اتنی ہے
شریروں کی ہمارے ملک میں تعداد کتنی ہے؟
یہی دو چار مُلا، پانچ چھ لڑکے شریروں سے
پرانے گھاگ لیڈر، جیل خانے کے اسیروں میں
انہیں زہر اب دے کر گولیوں سے کیجیے ٹھنڈا
کہ شوریدہ سروں کی ڈار کا استاد ہے ڈنڈا
یہ سب گستاخ ہیں، ان کے لیے تعزیر واجب ہے
یہ سب غدار ہیں، ان کے لیے زنجیر واجب ہے
یہ سب بزدل مسافر موت کے ہیں، موت پائیں گے
کسی حیلے بہانے سے نہ ہر گز باز آئیں گے

شاہ
بہت اچھا، ہم اب ان کے لیے اعلان کرتے ہیں
بس ان کی ناگہانی موت کا سامان کرتے ہیں

(25 مارچ کو ورق الٹ جاتا ہے)
در و دیوار پہ حسرت کی نظر کرتے ہیں
الٹ ڈالا، عوام الناس سے فرعون کا تختہ
طنابیں ٹوٹتی ہیں، شاہ زادے تھر تھراتے ہیں
وہ گوہر جان نے لاہور کو رخت سفر باندھا
وہ رقاصہ نکل کے پہلوئے اغیار میں پہنچی
ٹی شب دختِ رز پیمانۂ افکار میں پہنچی
سیاسی ڈوم ڈھاری چل بسے، شورِ فغاں اٹھا
زمانے کی روش پر ایک سیلاب رواں اٹھا
بہت سی قمریوں نے باغبانوں کو ہلا ڈالا
کئی ذروں نے مل کر آسمانوں کو ہلا ڈالا
عوام الناس جاگ اٹھیں،تو ناممکن ہے سو جائیں
علی بابا کے چوروں کی زبانیں گنگ ہو جائیں​
 

نبیل

تکنیکی معاون
شکریہ فہد، میں نے ایک جگہ پڑھا تھا کہ شورش کاشمیری کو محترمہ فاطمہ جناح کے ساتھ صدارتی انتخاب میں ایوب خان کی حمایت میں آگے لایا گیا تھا لیکن ان کی جلسہ گاہ میں تقریر کے پہلے جملے پر ہی عوام میں شور بلند ہو گیا اور انہیں نہایت شرمندگی کا سامنا کرنا پڑا اور وہ بعد میں ایوب خان کی حمایت پر پچھتاتے بھی رہے تھے۔

ایک مرتبہ عطاءالحق قاسمی نے اپنے ایک کالم میں شورش کاشمیری کی مذہبی رہنماؤں کے بارے میں ایک نظم پیش کی تھی جس پر فرید احمد پراچہ نے خاصا چراغ پا ہو کر عطاءالحق قاسمی کو ایک خط بھی لکھا تھا جو ان کے اگلے کالم میں شائع بھی ہوا تھا۔ اگر برا نہ مانیں تو یہ نظم آپ کے پاس ہو تو یہاں شیئر کر دیں۔
 

ابوشامل

محفلین
شکریہ فہد، میں نے ایک جگہ پڑھا تھا کہ شورش کاشمیری کو محترمہ فاطمہ جناح کے ساتھ صدارتی انتخاب میں ایوب خان کی حمایت میں آگے لایا گیا تھا لیکن ان کی جلسہ گاہ میں تقریر کے پہلے جملے پر ہی عوام میں شور بلند ہو گیا اور انہیں نہایت شرمندگی کا سامنا کرنا پڑا اور وہ بعد میں ایوب خان کی حمایت پر پچھتاتے بھی رہے تھے۔

ایک مرتبہ عطاءالحق قاسمی نے اپنے ایک کالم میں شورش کاشمیری کی مذہبی رہنماؤں کے بارے میں ایک نظم پیش کی تھی جس پر فرید احمد پراچہ نے خاصا چراغ پا ہو کر عطاءالحق قاسمی کو ایک خط بھی لکھا تھا جو ان کے اگلے کالم میں شائع بھی ہوا تھا۔ اگر برا نہ مانیں تو یہ نظم آپ کے پاس ہو تو یہاں شیئر کر دیں۔
اگر میرے پاس ہوتی تو میں ضرور شیئر کر لیتا۔ اگر آپ کو تلاش کے دوران مل جائے تو پیش کر دیجیے گا :)۔
 

فاتح

لائبریرین
زبردست انتخاب ارسال کیا ہے۔بہت شکریہ
چپڑ غٹو، الل ٹپو، نکھٹو، دًم کٹے ٹٹو خوب
 
Top