خواب مزدور ہے - رفیق سندیلوی

[شمشاد]

خواب مزدور ہے​

​

​

خواب مزدور ہے​

رات دن سر پہ بھاری تغاری لئے​

سانس کی​

بانس کی​

ہانپتی کانپتی سیڑھیوں پر​

اُترتا ہے​

چڑھتا ہے​

رُوپوش معمار کے حکم پر​

ایک لا شکل نقشے پہ اُٹھتی ہوئی​

اوپر اٹھتی ہوئی​

گول دیوار کے​

خِست در خِست چکر میں محصور ہے​

خواب مزدور ہے​

​

​

ایک مُشقت زدہ آدمی کی طرح​

میں حقیقت میں یا خواب میں​

روز معمول کے کام کرتا ہوں​

کچھ دیر آرام کرتا ہوں​

کانٹوں بھری کھاٹ میں​

پیاس کے جام پیتا ہوں​

اور سوزنِ ہجر سے​

اپنی ادھڑی ہوئی تن کی پوشاک سیتا ہوں​

جیتا ہوں​

کیسی انوکھی حقیقت ہے​

کیسا عجب خواب ہے​

ایک مشقت زدہ آدمی کی طرح​

اپنے حصے کی بجری اٹھانے پہ مامور ہے​

خواب مزدور ہے​

(رفیق سندیلوی)​

​