ماہر القادری حمد: ترا ذکر دل کی ہے زندگی، ترا نام راحتِ جاں بھی ہے

[محمد تابش صدیقی]

ترا ذکر دل کی ہے زندگی، ترا نام راحتِ جاں بھی ہے
ترے نور ہی کی ہے روشنی، تو یہاں بھی ہے، تو وہاں بھی ہے

کہیں تذکرے ہیں وجود کے، کہیں سلسلے ہیں سجود کے
تری ذاتِ پاک وہ راز ہے، جو عیاں بھی ہے، جو نہاں بھی ہے

ترے حکمِ کن فیکون کا ہے ازل کے روز سے سلسلہ
کہیں پھول ہے، کہیں خار ہے، یہ بہار بھی ہے، خزاں بھی ہے

ترا ذکر ہو، تری یاد ہو، ترا نام ہو کہ پیام ہو
یہی جانِ ابر بہار ہے، یہ چمن کی روحِ رواں بھی ہے
٭٭٭
ماہر القادریؒ​