حشر کا جب سے سُنا چرخِ کہن سکتے میں ہے غزل نمبر 176 شاعر امین شارؔق

[امین شارق]

الف عین سر یاسر شاہ
فاعِلاتن فاعِلاتن فاعِلاتن فاعِلن

ایک دِن مرنا پڑے گا ہر بدن سکتے میں ہے
حشر کا جب سے سُنا چرخِ کہن سکتے میں ہے

وہ خِزاں آئی کہ ہر اِک گُلبدن سکتے میں ہے
پُھول سب مُرجھا گئے ہیں اور چمن سکتے میں ہے

لوٹ کر جانا ہے سب کو انتہا بس موت ہے
گنگ ہیں ساری زبانیں ہر دہن سکتے میں ہے

دِل بھی سینے میں ہے سہما یوں شِکاری موت سے
جیسے جنگل میں کوئی سہما ہرن سکتے میں ہے

وقت جو گُذرا ہے واپس آ نہیں سکتا کبھی
جاں نِکل کر جا چکی ہے اور تن سکتے میں ہے

لوگ مرتے ہیں ہزاروں ،بستیاں ویران ہیں
کیسے کیسے دیکھے لاشے گورکن سکتے میں ہے

دشت کی تنہائی سے اِتنا سمجھ آیا مجھے
قیس کی بے چارگی دیکھی ہے بن سکتے میں ہے

جِس کا دُولہا چل بسے ہے بِن مرے ایسے ہی وہ
جیسے پہلی رات کی کوئی دُلہن سکتے میں ہے

تُجھ کو بھی مُجھ سے ہے اُلفت دِل نے یہ سوچا تھا جاں!
بے رُخی سے تیری میرا حُسنِ ظن سکتے میں ہے

شاعِری کے بادشاہ تھے اپنے اپنے دور کے
مِیر و غالب کی جُدائی پر سُخن سکتے میں ہے

رونقِ محفل ہُوا کرتا تھا میں شارؔق کبھی
میری تنہائی پہ ساری انجمن سکتے میں ہے​

 

[امین شارق]

بہت شکریہ صریر بھائی غزل پسند کرنے کے لئے۔۔

 

[الف عین]

ایک دِن مرنا پڑے گا ہر بدن سکتے میں ہے
حشر کا جب سے سُنا چرخِ کہن سکتے میں ہے

پہلا مصرع مہمل ہے۔ یعنی دونوں فقروں میں ربط نہیں ہے۔ "یہ سن کر" جو کہا نہیں گیا!
شاعِری کے بادشاہ تھے اپنے اپنے دور کے
بادشہ تقطیع میں آتا ہے، اسی طرح لکھنا بھی چاہیے۔ لیکن یہ سوال اٹھتا ہے کہ پہلے میر کا انتقال ہوا تو سخن سکتے میں آ گیا، پھر غالب کے انتقال سے پہلے اسےکب ہوش آیا؟ اور اب تک بھی سکتے میں ہی ہے!
باقی اشعار میں کوئی واضح خامی نہیں ہے لیکن بیان کی خامیاں ضرور ہیں۔ بہر حال مجھے یہ غزل پسند نہیں آئی۔ شاید سکتے میں ہی کہہ دی گئی ہے

 

[امین شارق]

سر کیا اب یہ درست ہے؟ میر و غالب والے شعر کو نکال دیتا ہوں۔
ایک دن مرنا ہے سُن کر ہر بدن سکتے میں ہے
حشر کا جب سے سُنا چرخِ کہن سکتے میں ہے

 

[یاسر شاہ]

بہر حال مجھے یہ غزل پسند نہیں آئی۔ شاید سکتے میں ہی کہہ دی گئی ہے

میری بھی یہی رائے ہے خاصا وحشت ناک تذکرہ کر دیا ہے موت کا کہ کافور کی خوشبو آرہی ہے غزل پڑھ کر۔

 

[الف عین]

سر کیا اب یہ درست ہے؟ میر و غالب والے شعر کو نکال دیتا ہوں۔
ایک دن مرنا ہے سُن کر ہر بدن سکتے میں ہے
حشر کا جب سے سُنا چرخِ کہن سکتے میں ہے

درست ہے

 

[امین شارق]

پہلا مصرع مہمل ہے۔ یعنی دونوں فقروں میں ربط نہیں ہے۔ "یہ سن کر" جو کہا نہیں گیا!
شاعِری کے بادشاہ تھے اپنے اپنے دور کے
بادشہ تقطیع میں آتا ہے، اسی طرح لکھنا بھی چاہیے۔ لیکن یہ سوال اٹھتا ہے کہ پہلے میر کا انتقال ہوا تو سخن سکتے میں آ گیا، پھر غالب کے انتقال سے پہلے اسےکب ہوش آیا؟ اور اب تک بھی سکتے میں ہی ہے!
باقی اشعار میں کوئی واضح خامی نہیں ہے لیکن بیان کی خامیاں ضرور ہیں۔ بہر حال مجھے یہ غزل پسند نہیں آئی۔ شاید سکتے میں ہی کہہ دی گئی ہے

سر ایک اور غزل سکتے میں لکھی ہے جلد شامل کروں گا۔

 

[امین شارق]

میری بھی یہی رائے ہے خاصا وحشت ناک تذکرہ کر دیا ہے موت کا کہ کافور کی خوشبو آرہی ہے غزل پڑھ کر۔

(کافور کی خوشبو) یاسر شاہ سر اس ردیف اور قافیہ پر تو ایک غزل بن سکتی ہے کوشش کروں گا اس پر ایک غزل بنانے کی۔۔