جوش ملیح آبادی ۔ نظم

[Safia kausar]

سراغ ِ راہرو

جہاں زمیں پر رگڑ کا نشاں ہویدا ہے

دلیل اس کی ہے سانپ اس طرف سے گزرا ہے


نشان ہلال نما راہ میں بتاتے ہیں

کہ تھوڑی دُور پہ آگے سوار جاتے ہیں


غبارِ راہ نشاں ہے کسی تگ و پو کا

یقین ہوتا ہے نقش قدم سے راہرو کا


صنم تراش نہ ہو تو صنم نہیں بنتا

قدم نہ ہو تو نشان ِ قدم نہیں بنتا


یونہی یہ راہ کہ ہے جس کا نام کاہ کشاں

یونہی یہ نقش ِ قدم ماہ و نیّر ِ تاباں


یونہی یہ گرد ِ سر ِ راہ خوش نما تارے

رواں ہیں جن کی جبینوں سے حسن کے دھارے


زمیں کا نور ہیں اور آسماں کی زینت ہیں

کسی کی شوخیء رفتار کی علامت ہیں


کلام: جوش ملیح آبادی

1892ء ۔ 1986ء

مآخذ: سرود و خروش