جانے کس نے رکھ دیا ہے رہگزر میں آئینہ

[حسن علی امام]

یہ تو اک اچھی خبر ہے تیرگی کے واسطے
گھر جلاے جا رہے ہیں روشنی کے واسطے

آ گئے بزم طرب میں کار وحشت چھوڑ کر
اور کیا کرتے بھلا ہم زندگی کے واسطے

تعزیت کے چند جملوں کو غنیمت جانئے
کون روتا ہے یہاں پر اب کسی کے واسطے

خنجروں کی دھار پہ چلتا رہا میں عمر بھر
پاؤں زخمی کرلئے ہیں اک خوشی کے واسطے

اس زمین پر آسماں برہم نہ ہو تو کیا کرے
زندگی ترسے جہاں پر زندگی کے واسطے

اے جبین شوق اتنی جستجو اچھی نہیں
اک خدا کافی نہیں کیا بندگی کے واسطے

جستجو کی راہ پر چلنے سے پہلے سوچ لیں
ظرف شرط اولین ہے آگہی کے واسطے

اصل میں ہم لوگ تو باغ عدم کے ہیں مکیں
یہ لباس زیست پہنا ہے کسی کے واسطے

جانے کس نے رکھ دیا ہے رہگزر میں آئینہ
خاک اڑائی جا رہی ہے بس اسی کے واسطے

نفرتوں کی آگ میں فیاض سب کچھ جل گیا
اس زمیں پر کیا بچا ہے آدمی کے واسطے​

 

[محمد خلیل الرحمٰن]

1. شاعر کا نام؟؟؟
2. مندرجہ ذیل شعر کے پہلے مصرع میں ٹائپو ہے

اصل میں ہم لوگ باغ عدم کے ہیں مکیں
یہ لباس زیست پہنا ہے کسی کے واسطے

 

[محمد خلیل الرحمٰن]

ٹائپو تو درست کردیا آپ نے۔ شکریہ

لیکن شاعر کا نام بھی لکھ دیجیے

 

[حسن علی امام]

جناب محمد خلیل الرحمٰن صاحب ، السلام علیکم ،
آپ کی نشاندہی پر ایک غلطی کو درست کرنے میں کافی وقت لگا ، اصل میں ، میں سیکھ رہا تھا اس لئے دیر ہوئی ، اب شاعر کے نام کیلئے مقطع ڈھونڈ رہا ہوں
ویسے اب مجھے مراسلے کو تبدیل کرنا آ گیا ہے .آپ کا ممنون ہوں .

 

[حسن علی امام]

نفرتوں کی آگ میں فیاض سب کچھ جل گیا
اس زمیں پر کیا بچا ہے آدمی کے واسطے

 

[محمد خلیل الرحمٰن]

نفرتوں کی آگ میں فیاض سب کچھ جل گیا
اس زمیں پر کیا بچا ہے آدمی کے واسطے

لیجیے جناب اصل غزل میں تدوین کردی ہے اور مقطع شامل کردیا ہے۔

 

[حسن علی امام]

جناب محمد خلیل الرحمٰن صاحب ، السلام علیکم ،
بہت شکریہ !