عدیم ہاشمی تر بہ تر اے چشم تجھ کو کر چلے

[شیزان]

تر بہ تر اے چشم تجھ کو کر چلے​

کم سے کم تیرا تو دامن بھر چلے​

​

ساتھ اپنے کچھ نہیں لے کر چلے​

سب یہاں کا تھا، یہیں پر دَھر چلے​

​

ہوتے ہوتے اور ہی کچھ ہو گیا​

کرتے کرتے اور ہی کچھ کر چلے​

​

رہ گیا باقی چراغوں کا دُھواں​

لوگ اُٹھ کر اپنے اپنے گھر چلے​

​

پانچویں تو سمت ہی کوئی نہیں​

تِیر چاروں سمت سے دل پر چلے​

​

پانچویں سمت اُس گھڑی ہم پر کُھلی​

جس گھڑی ہم خاک کے اندر چلے​

​

اک وفا رسمِ وفا ہوتی نہیں​

رسم وہ ہوتی ہے جو گھرگھر چلے​

​

یہ زمیں اُس وقت تک موجود ہے​

اِس زمیں کا جب تلک چکر چلے​

​

آخری لمحے لگا ایسے عدیم​

جیسے ہم رک جائیں اور منظر چلے​

​

خاک تھی دنیا کی جھولی میں عدیم​

خاک سے ہم اپنا دامن بھر چلے​