بس ایک ہی کیفیتِ دل صبح و مسا ہے - ارشادالرحمٰن عرش صدیقی

[پیاسا صحرا]

بس ایک ہی کیفیتِ دل صبح و مسا ہے
ہر لمحہ مری عمر کا زنجیر بہ پا ہے

میں شہر کو کہتا ہوں بیاباں کہ یہاں بھی
سایہ تری دیوار کا کب سر پہ پڑا ہے

ہے وقت کہ کہتا ہے رکوں گا نہ میں اک پل
تو ہے کہ ابھی بات مری تول رہا ہے

میں بزم سے خاکسترِ دل لے کے چلا ہوں
اور سامنے تنہائی کے صحرا کی ہوا ہے

میں ساتھ لئے پھرتا ہوں سامانِ ہلاکت
رگ رگ میں مری زہرِ وفا دوڑ رہا ہے

کیا کیا ہیں تمنائییں دلِ خاک بسر میں
یہ قافلہ ویرانے میں کیوں ٹھہرا ہوا ہے

ارشادالرحمٰن عرش صدیقی