بسان نگہتِ گل ساتھ ہم صبا کے چلے - مولانا سید علی حیدر صاحب طباطبائی نظم

[کاشفی]

غزل​

(مولانا سید علی حیدر صاحب طباطبائی نظم )​

​

بسان نگہتِ گل ساتھ ہم صبا کے چلے​

ہے آشنا وہ جو کہنے پہ آشنا کے چلے​

​

فضائے دیر میں ہم مثلِ برق آکے چلے​

تڑپ کے کاٹ دیا وقت مُسکرا کے چلے​

​

روا روی میں ہیں ہم سُن لو قافلے والو​

کہ جس کو ساتھ ہو دینا قدم اُٹھا کے چلے​

​

نمود رعشہء پیری ہوا ، اجل آئی​

چراغ صبح تھے گویا کہ جھلملا کے چلے​

​

نثار ہوجیئے اُس دل پہ ہو جو صاحبِ درد​

وہ پانوں چومئے جادے پہ جو وفا کے چلے​

​

سنا ہے برق کو اک لاگ ہے بلندی سے​

بشر نہ حد سے زیادہ بھی سر اُٹھا کے چلے​

​

خدا کے واسطے اے صبر و تاب و ہوش و خرد​

کہاں چلے کہ مجھے بیڑیاں پہنا کے چلے​

​

ہم اب تو میکدہ سے اُٹھ کے جا نہیں سکتے​

چلے جو چار قدم بھی تو لڑکھڑا کے چلے​

​

جب اپنی آنکھ ہوئی بند، سب کی آنکھ کُھلی​

جو گہری نیند میں تھے ان کو ہم جگا کے چلے​

 

[محمد وارث]

شکریہ کاشفی صاحب ارسال فرمانے کیلیے۔