برائے اصلاح

بحر----مضارع مثمن اخرب مکفوف محذوف
افاعیل- مفعول فاعلاتُ مفاعیل فاعلن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وعدوں سے اپنے ہی کبھی پِھرنا نہ چاہئے
دنیا کی نظروں سے کبھی گِرنا نہ چاہئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چاہت کسی کی چاہو تو مل جائے گی تمہیں
نفرت کا کوئی کام بس کرنا نہ چاہئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کوئی بھی تم سے غلطی ہو ہی جائے تو
الزام اس کا اور پہ دھرنا نہ چاہئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انجام ہو اگر کسی بھی کام کا بُرا
ایسے کسی بھی کام میں پڑنا نہ چاہئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لازم نہیں ہے تیری ہی سب باتیں ہوں غلط
اپنی کسی بھی بات پہ اڑنا نہ چاہئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ارشد تمہیں ملے گا کسی کا پیار بھی
اتنا تمہیں تو غم یوں ہی کرنا نہ چاہئے
 

الف عین

لائبریرین
قوافی پھر غلط ہیں . حرکات کا بھی خیال رکھنا چاہیے پھرنا گرنا جو مطلع میں ہیں زیر کے ساتھ ہیں تو سارے قوافی زیر والے ہی ہونا چاہیے پھر کرنا دھرنا میں 'ر' ہے، ڑ نہیں. اس لیے پڑنا وغیرہ قوافی درست نہیں
 
استادِ محترم میں نے مطلع تبدیل کر دیا ہے تاکہ سارے اشعار برابر ہو سکیں -
عاشق کے زخموں کو کبھی بھرنا نہ چاہئے
ورنہ تمہیں تو عشق ہی کرنا نہ چاہئے
 

الف عین

لائبریرین
اڑنا پڑنا قوافی اب بھی غلط ہیں باقی اشعار پر کمنٹس:

عاشق کےزخموں کو کبھی بھرنا نہ چاہئے
ورنہ تمہیں تو عشق ہی کرنا نہ چاہئے
... تکنیکی طور پر درست لیکن بے ربط مصرعے لگ رہے ہیں

چاہت کسی کی چاہو تو مل جائے گی تمہیں
نفرت کا کوئی کام بس کرنا نہ چاہئے
۔۔۔۔۔۔۔ بس کرنا محض بکرنا تقطیع ہو رہا ہے س کا اسقاط غلط ہے بس کی جگہ بھی استعمال کریں

کوئی بھی تم سے غلطی ہو ہی جائے تو
الزام اس کا اور پہ دھرنا نہ چاہئے
.... غلطی کا تلفظ لام پر زبر کے ساتھ درست ہے یہاں تو غلط تلفظ بھی وزن میں نہیں آتا۔ یوں کہیں
گر کوئی تم سے کام غلط ہو ہی جائے تو

ارشد تمہیں ملے گا کسی کا پیار بھی
اتنا تمہیں تو غم یوں ہی کرنا نہ چاہئے.
... پیار محض پار تقطیع ہوتا ہے، تو، یوں ہی بھرتی کے الفاظ ہیں
یوں کہہ سکتے ہیں
ارشد تمہیں ضرور ملے گا کسی کا پیار
یوں اس قدر بھی غم تمہیں کرنا نہ چاہئے
 
Top