واصف بدلے ہوئے حالات سے ڈر جاتا ہوں اکثر

[نظام الدین]

بدلے ہوئے حالات سے ڈر جاتا ہوں اکثر

شیرازۂ ملت ہوں، بکھر جاتا ہوں اکثر

میں ایسا سفینہ ہوں کہ ساحل کی صدا پر

طوفان کے سینے میں اتر جاتا ہوں اکثر

میں موت کو پاتا ہوں کبھی زیرِ کفِ پا

ہستی کے گماں سے بھی گزر جاتا ہوں اکثر

مرنے کی گھڑی آئے تو میں زیست کا طالب

جینے کا تقاضا ہو تو مرجاتا ہوں اکثر

رہتا ہوں اکیلا میں بھری دنیا میں واصف

لے نام مرا کوئی تو ڈر جاتا ہوں اکثر

(واصف علی واصف)​