بتِ بیدرد کا غم مونسِ ہجراں نکلا - حسرت شروانی

[حسان خان]

بتِ بیدرد کا غم مونسِ ہجراں نکلا​

درد جانا تھا جسے ہم نے وہ درماں نکلا​

​

آنکھ جب بند ہوئی تب کھلی آنکھیں اپنی​

بزمِ یاراں جسے سمجھے تھے وہ زنداں نکلا​

​

حسرت و یاس کا انبوہ، فغاں کی کثرت​

میں تری بزم سے کیا با سر و ساماں نکلا​

​

خون ہو کر تو یہ دل آنکھ سے برسوں ٹپکا​

نہ کوئی پر دلِ ناکام کا ارماں نکلا​

​

آئنہ، پیکرِ تصویر، نگاہِ مشتاق​

جسے دیکھا تری محفل میں وہ حیراں نکلا​

​

مجھ کو حیرت ہے ہوا کیا دمِ رخصت ہمدم​

جان نکلی مرے پہلو سے کہ جاناں نکلا​

​

خوب دوزخ کی مصیبت سے بچے ہم حسرت​

اُس کا داروغہ وہی یار کا درباں نکلا​

​

(حسرت شروانی)​

 

[فرخ منظور]

کیا اچھی غزل ہے۔ بہت خوب انتخاب۔ بہت شکریہ حسان میاں!

 

[صائمہ شاہ]

واہ
درد جانا تھا جسے ہم نے وہ درماں نکلا

 

[سید شہزاد ناصر]

مجھ کو حیرت ہے ہوا کیا دمِ رخصت ہمدم​

جان نکلی مرے پہلو سے کہ جاناں نکلا​

بہت خوب​

شریکِ محفل کرنے کا شکریہ​

شاد و آباد رہیں​

 

[سید زبیر]

لا جواب انتخاب

 

[امیداورمحبت]

خوب۔۔۔۔۔۔۔۔۔۔۔