بابِ مدحت پہ مری ایسے پذیرائی ہو ؛ سید شاکر القادری

[الف نظامی]

بابِ مدحت پہ مری ایسے پذیرائی ہو
لفظ خوشبو ہوں ، خیالات میں رعنائی ہو​

ہو اگر بزم ترا نام رہے وردِ زباں
تجھ کو سوچوں جو میسر کبھی تنہائی ہو​

وادیء جاں میں پڑاو ہو تری خوشبو کا
گوشہء دل میں تری انجمن آرائی ہو​

چاک کرتی ہیں قبا ، فرطِ ہوا سے کلیاں
اے صبا! کوچہء دل دار سے ہوآئی ہو؟​

وہ تکلم کہ جسے حسنِ سماعت ترسے
وہ تبسم کہ ہر اک پھول تمنائی ہو​

ناقہء شوق اس انداز سے طے ہو یہ سفر
لے حجازی ہو تری ، زمزمہ صحرائی ہو​

کس نے دیکھا ہے بہم شام و سحر کو شاکر
ہاں اگر زلف وہ رخسار پہ لہرائی ہو

(سید شاکر القادری)​