اے قلم لکھ مدحتِ شہ روحِ ایمانی کے ساتھ - نسیم کاظمی

[حسان خان]

اے قلم لکھ مدحتِ شہ روحِ ایمانی کے ساتھ​

جذبۂ جوشِ شہادت کی فراوانی کے ساتھ​

​

بادۂ الفت سے شہ کی جامِ دل لبریز ہے​

غم کو تازہ کر رہا ہوں اشک افشانی کے ساتھ​

​

زندگی مضمر ہے تیرے غم کی میٹھی آنچ میں​

ہے جواں اسلام تیری مرثیہ خوانی کے ساتھ​

​

تیرا ماتم کر رہے ہیں خوں بہا کر اے حسین​

اشکِ غم بھی بہہ رہے ہیں اک فراوانی کے ساتھ​

​

آؤ ابراہیم دیکھو کارزارِ کربلا​

مطمئن شبیر ہیں بیٹے کی قربانی کے ساتھ​

​

منسلک ہیں حضرتِ عباس یوں شبیر سے​

جس طرح سے ربط ہے اک موج کو پانی کے ساتھ​

​

استغاثہ کربلا میں شاہ کا ہنگامِ عصر​

تا ابد باقی رہے گا فکرِ انسانی کے ساتھ​

​

کربلا تصویرِ غم، شبیر ہیں تصویرِ صبر​

محوِ نظّارہ ہے عالم کتنی حیرانی کے ساتھ​

​

ایک اک نیزے پہ سر ہے ہر شہیدِ دین کا​

کیسی ہے بے حرمتی آیاتِ قرآنی کے ساتھ​

​

ہو گیا غرقاب بیڑا ظلم و استبداد کا​

ریگزارِ کربلا میں غم کی طغیانی کے ساتھ​

​

بے کفن لاشے، جلے خیمے، فضا پرهول ہے​

آئی ہے شامِ غریباں کتنی ویرانی کے ساتھ​

​

کھیلتے ہیں کربلا والے نڈر ہو کر نسیم​

ظلم کے دریا میں ہر اک موجِ طوفانی کے ساتھ​

​

(نسیم کاظمی)​

 

[مدیحہ گیلانی]

واہ بہت عمدہ کلام ہے۔ جیتے رہیے۔

زندگی مضمر ہے تیرے غم کی میٹھی آنچ میں​

ہے جواں اسلام تیری مرثیہ خوانی کے ساتھ۔​