گلزار ایک پرانا موسم لوٹا یاد بھری پروائی بھی ۔

[محمد عدنان اکبری نقیبی]

ایک پرانا موسم لوٹا یاد بھری پروائی بھی
ایسا تو کم ہی ہوتا ہے وہ بھی ہوں تنہائی بھی

یادوں کی بوچھاڑوں سے جب پلکیں بھیگنے لگتی ہیں
کتنی سوندھی لگتی ہے تب ماضی کی رسوائی بھی

دو دو شکلیں دکھتی ہیں اس بہکے سے آئینے میں
میرے ساتھ چلا آیا ہے آپ کا اک سودائی بھی

خاموشی کا حاصل بھی اک لمبی خاموشی ہے
ان کی بات سنی بھی ہم نے اپنی بات سنائی بھی
گلزار​

 

[محمداحمد]

خوبصورت غزل ہے۔

اور جگجیت نے گائی بھی خوب ہے، بہت دھیمے لہجے میں بہت ہلکے سُروں میں۔

یادوں کی بوچھاڑوں سے جب پلکیں بھیگنے لگتی ہیں
کتنی سوندھی لگتی ہے تب مانجھی کی رسوائی بھی

یہ غالباً ماضی کی رسوائی ہے۔

 

[محمداحمد]

ریختہ پر یہ غزل اس طرح سے ہے:

کانچ کے پیچھے چاند بھی تھا اور کانچ کے اوپر کائی بھی
تینوں تھے ہم وہ بھی تھے اور میں بھی تھا تنہائی بھی

یادوں کی بوچھاروں سے جب پلکیں بھیگنے لگتی ہیں
سوندھی سوندھی لگتی ہے تب ماضی کی رسوائی بھی

دو دو شکلیں دکھتی ہیں اس بہکے سے آئینے میں
میرے ساتھ چلا آیا ہے آپ کا اک سودائی بھی

کتنی جلدی میلی کرتا ہے پوشاکیں روز فلک
صبح ہی رات اتاری تھی اور شام کو شب پہنائی بھی

خاموشی کا حاصل بھی اک لمبی سی خاموشی تھی
ان کی بات سنی بھی ہم نے اپنی بات سنائی بھی

کل ساحل پر لیٹے لیٹے کتنی ساری باتیں کیں
آپ کا ہنکارا نہ آیا چاند نے بات کرائی بھی
​