ایک سوکھا ہوا دشت ٹھہرا بدن، اے مرے شعلہ زن ۔اسلم کولسری کا مخصوص رنگ لیے ایک غزل

[چوہدری لیاقت علی]

ایک سوکھا ہوا دشت ٹھہرا بدن، اے مرے شعلہ زن
اب تو اعزاز ہوا آتشیں پیراہن،اے مرے شعلہ زن
ماند پڑنے لگی اشک لرزاں کی لَو،اے مرے ماہ ضو
کوئی اندوہ نَو، کوئی زخم کہن،اے مرے شعلہ زن
اب تو دل میں ذرا بھی حرارت نہیں، کچھ عبارت نہیں
کوئی حرف حسیں، کوئی سطر سخن،اے مرے شعلہ زن
چند بکھرے ہوئے کاغذوں کے سوا،کچھ عبارت نہیں
منتظر ہے ترا، یہ خرابہ، یہ بن، اے مرے شعلہ زن
دل میں امید کی پھانس بھی ہے ابھی، سانس بھی ہے ابھی
اس سے پہلے کہ بجھنے لگے ہر کرن،اے مرے شعلہ زن
اس سے پہلے کہ یہ کلبہ غم نہ ہو، یعنی اسلم نہ ہو
اے مرے شعلہ زن،اے مرے شعلہ زن،اے مرے شعلہ زن