اصلاح کے لئے ۔۔۔ نظم ۔۔۔ سببِ سفر

[loneliness4ever]

جلوت سے خلوت میں ڈوب جانے والے دل
خموشی کی آغوش میں سو جانے والے قلم کی پکار

سببِ سفر

نہ محبتوں میں صداقتیں نہ عداوتوں میں حقیقتیں
یہ جہان کا ہے مزاج اب کہ ضرورتوں کے ہیں سلسلے
نہ عبادتوں میں خلوص ہے نہ ریاضتوں کا حصول ہے
نہ ہی منزلوں کی رہی طلب نہ ہی راستوں کی تلاش ہے
یہ جو محفلیں ہیں سجی یہاں یہ ضرورتوں کا ہی کھیل ہے
سبھی رابطوں میں نہاں یہ سچ کہ ضرورتوں کا یہ روپ ہے
رہی دسترس میں جو چیز دل تجھے اس پہ ہے گا قرار کب
سدا خواہشوں کے غبار میں یہاں زندگی کہیں کھو گئی
یہ جو آس پاس ہیں لوگ سب یہ تو مطلبوں ہی کی بھیڑ ہے
یہ صداقتیں یہ حقیقتیں کہ جہان میں ہے خلوص کم
یہاں دوستی کے لباس میں ملے دشمنی ہی کے روپ سب
نہ ملے جہان میں مخلصی یہی درد وغم یہی زندگی
نہ ہی دل ملا نہ ہی دوست اب رہے مخلصی کے لباس میں
یہی مختصر یہی معتبر یہاں مخلصوں کا ہے قال اب
یہی ریت اب ہے جہان کی کہ ضرورتوں کے ہیں رابطے
مری التجا مری بات سن مجھے چھوڑ مت مجھے ساتھ رکھ
کہیں دور دور جہان سے مجھے بھی لے چل اے گزرتے سال


س ن مخمور
امر تنہائی

 

[الف عین]

تکنیکی طور پر
یہی مختصر یہی معتبر یہاں مخلصوں کا ہے قال اب
... قال یہاں کن معنوں میں استعمال کیا گیا ہے، سمجھ نہیں سکا۔ ایک شک 'کال' کی غلط املا ہو سکتی ہے۔ یعنی قحط، تو درست ہے.۔

کہیں دور دور جہان سے مجھے بھی لے چل اے گزرتے سال
وزن میں نہیں آتا
معنوی اعتبار سے اکثر کچھ ٹکڑے یعنی نصف مصرعے غیر متعلق محسوس ہوتے ہیں جیسے بحر و اوزان مکمل کرنے کے لیے زبردستی داخل کیے گئے ہیں

مری التجا مری بات سن مجھے چھوڑ مت مجھے ساتھ رکھ
کس سے کہا جا رہا ہے؟
اصل بات تو کہی ہی نہیں گئی! کہ اس سبب سے میں اس دنیا سے دور جانا چاہتا ہوں!