جوش ابدی شعلہ - جوش ملیح آبادی

[حسان خان]

زباں ساکت ہے، لیکن تر زبانی اب بھی ہوتی ہے​

لبِ خاموش سے جادو بیانی اب بھی ہوتی ہے​

​

حدیثِ نفس کی صورت میں اکثر خود بخود پہروں​

زمانِ کیف کی افسانہ خوانی اب بھی ہوتی ہے​

​

لبِ گل رنگ کو ہوتی ہے جنبش جب تصور میں​

سماعت کی زمیں پر گل فشانی اب بھی ہوتی ہے​

​

کبھی جب عہدِ رنگینی کی راتیں یاد آتی ہیں​

عروسِ شوق کی پوشاک دھانی اب بھی ہوتی ہے​

​

بہ ایں طغیانِ حکمت، کون مانے گا کہ اِس دل پر​

مسلط ہر بلائے آسمانی اب بھی ہوتی ہے​

​

رسولِ شادمانی ہوں مگر چھڑتے ہیں جب نغمے​

نظر سے سوزِ غم کی ترجمانی اب بھی ہوتی ہے​

​

خدائے خندہ ہوں، لیکن جب اُن کی یاد آتی ہے​

مری آنکھوں سے اشکوں کی روانی اب بھی ہوتی ہے​

​

ترانوں سے مری محفل کو گو فرصت نہیں ملتی​

مگر تنہائیوں میں نوحہ خوانی اب بھی ہوتی ہے​

​

بہ ایں مشقِ تحمل، بارہا خاموش راتوں میں​

کسی کی یاد ۔ مرگِ ناگہانی اب بھی ہوتی ہے​

​

خرد کا دور ہے، لیکن مرے کمبخت سینے میں​

جنوں کی گاہے گاہے پَرفشانی اب بھی ہوتی ہے​

​

کسی کے روئے رنگیں کی صباحت کے تصور میں​

چمن کی چاندنی اکثر سہانی اب بھی ہوتی ہے​

​

وفورِ یاس سے گو دل رہینِ برف و شبنم ہے​

کبھی پچھلے پہر آتش فشانی اب بھی ہوتی ہے​

​

نہ جانے جوش کس ارماں میں اب تک جان جاتی ہے​

کہ اکثر آرزوئے زندگانی اب بھی ہوتی ہے​

​

(جوش ملیح آبادی)​

 

[شوکت پرویز]

کبھی جب عہدِ رنگینی کی راتیں یاد آتی ہیں

عروسِ شوق کی پوشاک دھانی اب بھی ہوتی ہے​

​

بہ ایں طغیانِ حکمت، کون مانے گا کہ اِس دل پر​

مسلط ہر بلائے آسمانی اب بھی ہوتی ہے​

​

​

خدائے خندہ ہوں، لیکن جب اُن کی یاد آتی ہے​

مری آنکھوں سے اشکوں کی روانی اب بھی ہوتی ہے​

​

​

وفورِ یاس سے گو دل رہینِ برف و شبنم ہے​

کبھی پچھلے پہر آتش فشانی اب بھی ہوتی ہے​

​

نہ جانے جوش کس ارماں میں اب تک جان جاتی ہے​

کہ اکثر آرزوئے زندگانی اب بھی ہوتی ہے​

​

جناب بہت خوب صورت انتخاب ہے۔ شیئر کرنے کے لئے شکریہ۔۔۔

 

[فارقلیط رحمانی]

ابدی شعلہ ! واقعتا ایک شعلہ ہے۔ بہت خوب! شکریہ