ایاز صدیقی آپ آئے ذہن و دل میں آگہی کا در کھلا.....ایاز صدیقی

[مہ جبین]

آپ آئے ذہن و دل میں آگہی کا در کھلا​

جہل نے بازو سمیٹے ، علم کا شہپر کھلا​

​

چاند سورج آپ کی تنویر سے روشن ہوئے​

بابِ مغرب وا ہوا ، دروازہء خاور کھلا​

​

آپ کی بخشش ہے سب پر کیا فرشتے کیا بشر​

آپ کا بابِ سخاوت ہے دوعالَم پر کھلا​

​

جب زمیں پر آپ کے قدموں سے بکھری کہکشاں​

مقصدِ تکوینِ عالم تب کہیں جاکر کھلا​

​

ہم گنہگاروں کی پردہ پوشیاں ہوجائیں گی​

آپ کا دامانِ رحمت جب سرِ محشر کھلا​

​

دل میں جب آیا کبھی عہدِ رسالت کا خیال​

ایک منظر وقت کی دیوار کے اندر کھلا​

​

قلبِ مضطر پر کسی نے دستِ تسکیں رکھ دیا​

اُن کے سنگِ در پہ اس آئینے کا جوہر کھلا​

​

اس کو کہتے ہیں سخاوت یہ سخی کی شان ہے​

حرف بھی لب پر نہ آیا ، لطف کا دفتر کھلا​

​

اُس کی مدحت کیا لکھیں گے ہم زمیں والے ایاز​

جس شہِ لوح و قلم پر گنبدِ بے در کھلا​

​

ایاز صدیقی​

​

​

​

​

​

​

 

[نایاب]

سبحان اللہ

کیا بیان شان پاک مسلسل ہے​

جب زمیں پر آپ کے قدموں سے بکھری کہکشاں​

مقصدِ تکوینِ عالم تب کہیں جاکر کھلا​

جزاک اللہ خیراء محترم بہنا​

اللہ تعالی آپ کو محفل حضوری کی سعادت سے باریاب فرمائے آمین​

 

[مہ جبین]

کلام کی پذیرائی اور دعاؤں کے لئے بہت مشکور ہوں نایاب بھائی

جزاک اللہ

 

[مدیحہ گیلانی]

اس کی امت میں ہوں مَیں، میرے رہیں کیوں کام بند
واسطے جس شہ کے غالب گنبدِ بے در کھلا
واہ سبحان الله غالب کی زمین میں کیا خوبصورت کلام ہے .
اس کو کہتے ہیں سخاوت یہ سخی کی شان ہے

حرف بھی لب پر نہ آیا ، لطف کا دفتر کھلا​

جزاک اللہ​