فرحان دانش
محفلین
ناظم کراچی سید مصطفی کمال نے کہا ہے کہ آتشزدگی سے متاثر ہونے والے تاجروں کو اسی جگہ پر بحال کیا جائے گا جہاں ان کا آتشزدگی سے قبل کاروبار تھا اس کے لئے جمعرات سے بولٹن مارکیٹ میں مستقل کیمپ آفس قائم کرکے ون ونڈو آپریشن شروع کردیا گیا ہے۔ان خیالات کا اظہارانہوں نے متاثرہ تاجروں کی 30 رکنی نمائندہ کمیٹی سے ملاقات کے بعد سوک سینٹر میں مشترکہ پریس کانفرنس سے خطابکرتے ہوئے کیا۔سٹی ناظم نے کہا کہ تمام متاثرہ تاجروں کا مطالبہ ہے کہ ان کو اسی جگہ پر بحال کیا جائے جہاں ان کی دکان تھی لہٰذا ہر ایک تاجر کو اپنی دکان میں ہی پرانی پوزیشن میں بحال کیا جائے گا انہوں نے کہا کہ متاثرہ تاجروں کو زیادہ سے زیادہ سہولت پہنچانے اور بحالی کے کام کو جنگی بنیادوں پر کرنے کے لئے بولٹن مارکیٹ میں مستقل کیمپ آفس قائم کردیا گیا ہے جہاں واٹر بورڈ، کے ای ایس سی، پی ٹی سی ایل، سوئی سدرن گیس، ریونیو ڈپارٹمنٹ کے افسران اور کے بی سی اے کے فیصلہ ساز افسران اس کیمپ میں موجود ہونگے تاکہ متاثرہ تاجروں کو دفاتر کے چکر نہ لگانے پڑیں اور ایک ہی جگہ ان کے تمام کام ہوں انہوں نے اس موقع پر اعلان کیا ہے کہ سٹی حکومت کی جانب سے قائم فنڈ کو چیمبر آف کامرس اینڈ انڈسٹری کے نمائندوں کے بجائے متاثرہ تاجروں کی کمیٹی کی مشاورت سے ہی استعمال کیا جائے گا۔ کمیٹی کے نمائندہ سلیم فاروقی نے کہا کہ یہی کمیٹی متاثرین کے مسائل کے حوالے سے بات چیت کرنے کی مجاز ہوگی۔ ہر سطح پر یہی کمیٹی مذاکرات کرے گی ۔ ایک اور نمائندے رفیق جدون نے کہا کہ فائر بریگیڈ کی گاڑیوں نے بروقت کام شروع کردیا تھا مگر دہشت گردوں نے فائرنگ کرکے آگ بجھانے کا کام نہیں ہونے دیا جس سے دو ڈھائی گھنٹے کی تاخیر ہوئی۔
روزنامہ جنگ
روزنامہ جنگ
