بزم یار

محمل ابراہیم نے کہا:

جو تم نہیں تو بزم میں ،چراغ بھی جلے نہیں
اُداسیاں ہیں چار سو، دل مرا لگے نہیں
میرے خیال میں دوسرا مصرعہ اب بھی بحر میں نہیں
دوسرے ٹکڑے کا پہلا رکن فاعلن بن رہا ہے، جبکہ اس کو مفاعلن ہونا چاہیے۔ میرے خیال میں مصرعۂ ثانی کے لئے اصل والا ہی بہتر تھا، وزن کی درستی کے بعد، مثلاً
دھواں دھواں تھیں رونقیں کہ دورِ مے چلے نہیں

تھا اس کو زعم اس کے بن ،مرا وجود کچھ نہیں
چلا گیا وہ چھوڑ کر،کف بھی ہم ملے نہیں
دوسرے مصرعے میں ’’کف بھی ہم ملے نہیں‘‘ کہنا غیر معیاری اور غیر فصیح معلوم ہوتا ہے۔ یہاں ’’ہم نے‘‘ ہونا چاہیے، لیکن وزن درست رکھنے کے لئے الفاظ کی نشست و ترتیب بدلنا پڑے گی۔

کہ بستیوں میں سانپ کی،میں پل کے ہوں جواں ہوئی
مگر یہ بات اور ہے، کہ مجھ سے وہ پلے نہیں
پہلا مصرعہ ’’کہ‘‘ سے شروع ہونا مجھے تو ہمیشہ ہی بہت عجیب لگتا ہے۔ دوسرے یہ کہ یہاں سانپ کی بستیاں نہیں، سانپوں کی بستی کہنا چاہیے۔
مگر یہ شعر مفہوم کے اعتبار سے بہت واجبی سا لگتا ہے، اس لئے میرے خیال میں اس کو نکال دیں تو بہترہے۔

اڑان بھرنے کے لئے، پروں کو اپنے تول لو
سفر ہو کتنا بھی طویل،فیصلہ ٹلے نہیں
یہاں دوسرے مصرعے میں وہی مطلع والا مسئلہ درپیش ہے، مصرعۂ ثانی کا دوسرا ٹکڑا فاعلن مفاعلن پر موزوں ہورہا ہے۔
سفر ہو کتنا بھی کٹھن، یہ فیصلہ ٹلے نہیں

کھلے ہوئے تھے در سبھی،قریب تر تھیں منزلیں
صدا بھی شہرِ آرزو نے دی،پہ ہم گئے نہیں
یہاں قافیہ درست نہیں۔ مطلع میں جلے اور چلے کی تخصیص ہوچکی، اب صرف وہی الفاظ بطور قافیہ لائے جا سکتے ہیں ج میں ’’لے‘‘ مشترک ہو اور ل سے پہلے والے حرف پر زبر ہو۔

چہار سو شمع کے کیوں، ہے رقص اضطراب سا
سجی ہے بزمِ عشق پر،کوئی بھی دل جلے نہیں
شمع کا تلفظ ٹھیک نہیں میرے خیال میں۔ شمع کی م اور ع دونوں ساکن ہوتی ہیں۔
اضطراب سا رقص؟؟؟ اگر اضطراب کا رقص کہا جائے تو شاید قابل قبول ہو۔
’’کوئی بھی دل جلے نہیں‘‘ کہنا بھی گرامر کے لحاظ سے ٹھیک نہیں کوئی کی تخصیص کے بعد واحد کا صیغہ آئے گا، یعنی کوئی بھی دل جلا نہیں۔
پھر دونوں مصرعوں کا ربط بھی واضح نہیں۔ گویا اگر ہم شعر کو یوں بھی فرض کرلیں
چہار سو کیوں شمع کے، ہے رقص اضطراب کا
سجی ہے بزمِ عشق پر یہاں پہ دل جلے نہیں
تب بھی مفہوم واضح نہیں ہوتا۔

جو مجھ سے تم کو عار ہے،تو کیسے جوش و ولولے
ملاؤ ہاتھ دور سے ،لگاؤ تم گلے نہیں
یہ بھی بہت واجبی سا شعر لگتا ہے، دور سے ہاتھ ہلایا تو جاسکتا ہے، ملایا کیسے جائے گا؟؟؟ دوبارہ فکر کر کے دیکھیں، نہیں تو نکال دیں۔

تمام ہوگی کب یہ شب،گزر ہے اس کا کب تلک
وہ صبح لا مرے خدا، جو پھر کبھی ڈھلے نہیں
درست

مزید نمائش کے لیے کلک کریں۔۔۔

محمل ابراہیم نے کہا:

جو تم نہیں تو بزم میں، چراغ بھی جلے نہیں
ہیں رونقیں دھواں دھواں، دور مئے چلے نہیں

تھا اس کو زعم اس کے بن، مرا وجود کچھ "نہیں"
چلا گیا وہ چھوڑ کر ،ہم ہاتھ بھی ملے نہیں

مزید نمائش کے لیے کلک کریں۔۔۔

کیا ردیف کسی قافیہ کے بغیر بھی استعمال میں لایا جا سکتا ہے جیسا کہ دوسرے شعر میں "نہیں" کا استعمال ہوا ہے

مزید نمائش کے لیے کلک کریں۔۔۔

محمّد احسن سمیع :راحل: نے کہا:

abdul.rouf620 بھائی
یہ دراصل غزل کے معمولی عیوب میں سے ہے، جسے تقابل ردیفین کہتے ہیں۔ اس سے احتراز کرنا بہرحال بہتر ہے۔

مزید نمائش کے لیے کلک کریں۔۔۔

محمل ابراہیم نے کہا:

وہ اور لوگ تھے سحر،جو رومیو اور قیس تھے
ہے اب بھی عاشقوں کا رش،پر ویسے دل جلے نہیں

مزید نمائش کے لیے کلک کریں۔۔۔

abdul.rouf620 نے کہا:

"رش" تو انگریزی کا لفظ ہے عمومی طور پر یا پھر مزاحیہ شاعری میں تو استعمال ہوتا ہو گا مگر سنجیدہ شاعری میں تو اساتذہ کبھی اجازت نہیں دیں گے

مزید نمائش کے لیے کلک کریں۔۔۔

محمّد احسن سمیع :راحل: نے کہا:

اساتذہ کی رائے یقیناً واجب الاحترام ہے، تاہم میری ناچیز رائے میں یہ لفظ تو اردو میں اس قدر کثرت سے مستعمل ہے کہ اب اس کو اسی طرح برتنا چاہیے جیسے عربی اور فارسی الفاظ کو برتا جاتا ہے۔ میرے خیال میں کم از کم نوجوان شعرا کو تو اس معاملے میں کچھ رعایت دی جانی چاہیے۔ ہاں، مصرعے میں الفاظ کی ترتیب و نشست کے حساب سے کوئی لفظ جچ بھی رہا ہو ۔۔۔ یہ الگ قصہ ہے۔ اور یہ صرف انگریزی الفاظ کے ساتھ خاص نہیں۔ کچھ عربی اور فارسی زدہ نئے شعرا تو لگتا ہے عربی اور فارسی کی لغات سامنے رکھ کر شعر کہتے ہیں۔ اس قدر اجنبی اور نامانوس الفاظ استعمال کرتے ہیں کہ تشریح کرنے کے لئے فرہنگِ آصفیہ بھی کافی نہیں رہتی

مزید نمائش کے لیے کلک کریں۔۔۔

محمل ابراہیم نے کہا:

تھا اس کو زعم اس کے بن ،مرا وجود کچھ نہیں
چلا گیا وہ چھوڑ کر، پہ ہاتھ ہم ملے نہیں

مزید نمائش کے لیے کلک کریں۔۔۔

محمل ابراہیم نے کہا:

بہت حسین شام ہے،مگر یہ مجھ کو کیا ہوا؟
کیوں دل اُداس ہے مرا؟کیوں اس میں ولولے نہیں؟

مزید نمائش کے لیے کلک کریں۔۔۔

محمل ابراہیم نے کہا:

وہ اور لوگ تھے سحر،جو رومیو اور قیس تھے
ہے اب بھی عاشقوں کا رش،پر ویسے دل جلے نہیں

مزید نمائش کے لیے کلک کریں۔۔۔

abdul.rouf620 نے کہا:

پہلے میں ایک خاموش قاری تھا محفل کا چکر لگاتا ہر ایک کی بات سنتا اور چلا جاتا جتنا کچھ نیا سیکھنے کو ملتا وہ کچھ دیر میں دماغ سے محو ہو جاتا ا ور اب جب کہ جاسمن کے کہنے پر میں اپنی حاضری کو درج کراتا ہوں یعنی لب کشائی شروع کر دی ہے تو سیکھنے کو مل رہا ہے جس پر ذاتی تجربہ ہونے کی وجہ سے کچھ نہ کچھ پلے بھی پڑ رہا ہے جس کے محو ہو جانے کا اندیشہ بھی نہیں ہو رہا

مزید نمائش کے لیے کلک کریں۔۔۔

جاسمن نے کہا:

زبردست۔
واقعی عبدالروف ! یہاں بہت کچھ سیکھنے کو ملتا ہے۔
الحمدللہ۔

مزید نمائش کے لیے کلک کریں۔۔۔