اگلی بریک تقریباً دو گھنٹے کے بعد جگلوٹ کے قریب نانگا پربت ویو پوائنٹ کے پاس لگائی گئی۔ حسبِ معمول میڈم نانگا پربت صاحبہ بادلوں میں ملفوف و ملبوس وغیرہ تھیں۔
راکاپوشی و گولڈن پیک وغیرہ قراقرم رینج میں ہیں، جبکہ نانگا پربت ہمالیہ رینج میں ہے۔ وہی ہمالیہ جس کی بابت اقبال نے کہا تھا
اے ہمالہ! اے فصیلِ کشورِ ہندوستاں
چُومتا ہے تیری پیشانی کو جھُک کر آسماں
تجھ میں کُچھ پیدا نہیں دیرینہ روزی کے نشاں
تُو جواں ہے گردشِ شام و سحَر کے درمیاں
بابوسر پہنچے تو وہاں اتنی گاڑیاں تھیں کہ ہمارا دل ہی خراب ہو گیا اور بغیر رکے آگے بڑھ گئے اور چار پانچ منٹ بعد بریک کر کے تصویرکشی کی کہ گولڈن آور بھی تھا۔
