مٹھی اڈیک تہ اڈیک نالوں یار مٹھا
مٹھا یار تہ یار نالوں عشق مٹھا
مٹھا عشق تہ عشق نالوں مٹھی ساڈی یاری
اس توں مٹھا کجھ نئیں لبھنا، لبھ لے تو دنیا ساری
(نہ معلوم)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نال سلوک دے بول وے ماہی، اسی ہاں پردیسی پکھی
تئیں محبوب دے ویکھن کارن، بیٹھے بوہت اُڈیک رکھی
جد تک ساکوں نظر نہ آوے ، ساڈی تھک تھک جاون اکھی
یار فرید اوہ فیر کد مُڑدے۔ جنہاں لذت عشق دی چکھی
(بابا فرید )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دل دِیاں لگراں تے بُور جدوں پے جائے
پل دی وی دُوری کولوں دل اے تریہہ جائے
ہجر والا ناگ جدپنڈے نال کھہہ جائے
چُوری والا چھنّاں فیر ہتھ وچ رہ جائے
اُڈّن توں پہلاں اِک کاں کُجھ کہہ جائے
آس دا بنیرا آپوں ہولی ہولی ڈھہہ جائے
جند اِنج وعدے والی سُولی اُتّے ڈول دی
رُوح وی ناں نکلے پواڑا جیہا پے جائے
ہور گلّاں دل پاویں ساریاں ہی سہہ جائے
چندری اُڈیک ربّا کسے نوں ناں پے جائے
تنویر شاہدؔ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اسیں مُجرم عشق دے جرم دے، اسیں سُفنے لیے اُڈیک
ساتھے لگن روز عدالتاں ،سانو پے جاے روز تریک
نِت آساں لا لا بیٹھئے، نِت دل تے ماریے لیک
کدی چِھکے چَن آسمان تے، کدی مِٹی لوے دَھرِیک
(نا معلوم )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نال جوگ کر۔۔۔ کالا ویس
رانجھا ٹُریا ۔۔۔رنگ پور دیس
ہِیرنَمانی۔۔۔ پئی اُڈیکے
آوے رانجھا۔۔۔ بن درویش
(نا معلوم )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اَساں بیجے رُکھ انار دے سانوں لبّھے تُمّے کَوڑ
اَساں مرن دیہاڑ اُڈیک دے ساڈی ود دی جاوےَ سوڑ
(نا معلوم )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محمود اعوان
تینڈے ناں دی روز چنبیلڑی
مینڈے سُکّے سینے جاگدی
تینڈے سورج نال سویلڑے
تینڈے ویڑھے کھیڈدے ویلڑے
نِت ہولی ہولی کھولدے
مینڈے ساہواں وجّی تاکڑی
تینڈی نیلی ساوی چُنیاں
تینڈے ہوٹھیں کِھڑدی چمیاں
آ دور سمندر رُنیاں
تینڈے ساہواں پانی گیڑیا
دِن اوکھا آن سہیڑیا
مینڈی رات اداس اکیلڑی
مینڈا بستر پَینڈے ٹوردا
میں سُتا ہور دے ہور دا
مینڈے پِنڈے اندر بَھوندیٔے
مینڈے خاباں دے وچ روندیٔے
نی بُوہا بند کریندیٔے
مینوں تھوڑا ہور اُڈیک
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جیہناں اُڈیک تیری دیاں تانگھاں درد جھلے مُشتاقاں
چل ہُن وقت دراز ہویا ای تیریاں وچ فراقاں
مولوی غلام رسول عالمپوری