ناصر کاظمی تم آ گئے ہو تو کیوں اِنتظارِ شام کریں

[شیزان]

تم آ گئے ہو تو کیوں اِنتظارِ شام کریں
کہو تو کیوں نہ ابھی سے کچھ اہتمام کریں​

خلوص و مہر و وفا لوگ کر چکے ہیں بہت
مرے خیال میں اب اور کوئی کام کریں​

یہ خاص وعام کی بیکار گفتگو کب تک!
قبوُل کیجیے، جو فیصلہ عوام کریں​

ہر آدمی نہیں ‌شائستۂ رموزِ سُخن
وہ کم سُخن ہو مخاطب تو ہم کلام کریں​

جُدا ہوئے ہیں بہت لوگ، ایک تم بھی سہی
اب اِتنی بات پہ کیا زندگی حرام کریں​

خُدا اگر کبھی کچھ اِختیار دے ہم کو
تو پہلے خاک نِشینوں کا انتظام کریں​

رہِ طلب میں جو گمنام مر گئے ناصر
متاعِ درد انہی ساتھیوں کے نام کریں

ناصر کاظمی​

 

[طارق شاہ]

جُدا ہوئے ہیں بہت لوگ، ایک تم بھی سہی
اب اِتنی بات پہ کیا زندگی حرام کریں


بہت خوب انتخاب !

تشکر شیئر کرنے پر
​

 

[صائمہ شاہ]

متفق

ہر آدمی نہیں ‌شائستۂ رموزِ سُخن​

 

[شیزان]

جُدا ہوئے ہیں بہت لوگ، ایک تم بھی سہی
اب اِتنی بات پہ کیا زندگی حرام کریں


بہت خوب انتخاب !

تشکر شیئر کرنے پر
​

دلی شکریہ شاہ جی
سدا خوش رہیئے