کلاسیکی شعرا کے کلام سے انتخاب

[فرخ منظور]

رباعی
جام آپ نے دم بہ دم دیے ہیں کیا کیا
خوں نابۂ درد و غم پیے ہیں کیا کیا
کچھ کش مکشِ صبر و جفا کی حد ہے؟
انصاف کرو، ستم کیے ہیں کیا کیا
(مومن)

 

[فرخ منظور]

کیا اعتبار دہر کا، عبرت کی جا ہے یہ
عشرت سرا کبھی کبھی، ماتم سرا ہے یہ

(مومن)

 

[شہزاد احمد]

سراج اورنگ آبادی کے چند اشعار

آبِ رواں ہے حاصلِ عمرِ شتاب رو
لوحِ فنا میں نقش نہیں ہے ثبات کا

اے بت پرست دیدہء بینا سیں دیکھ توں
یک ذات میں ظہور ہو کئی صفات کا

مے خانہء وحدت کا جو کوئی جام پیا ہے
آرام کے کوچے سے نکل بے خبر آیا

پردہء سری کھلا ہے جس اوپر
عالمِ ظاہر کا وو غافل ہوا

گر کرے احوالِ شبنم پر نظر
رُتبہ خورشید کیا کم ہویگا

اپنی قسمت کے غم و عیش میں شاکر ہوں سراج
جو منجم نے ازل کے، میری تقویم کیا

سب جگت ڈھونڈ پھرا یار نہ پایا لیکن
دل کے گوشہ میں نہاں تھا مجھے معلوم نہ تھا

درپیش ہے ہم کوں سفرِ منزل مقصود
بس آہِ سحر گاہ یہ سامان ہمارا

جو کوئی شغلِ کثرت سیں خالی ہوا
وہ اسرارِ وحدت کا حالی ہوا

حیف ہے اس کی تماشا بینی
چشمِ باطن کوں جو کئی وا نہ کیا

جو اٹھا مجلسِ ناسوتی میں
محرم خلوتِ لاہوت ہوا

 

[شہزاد احمد]

سراج اورنگ آبادی کے چند اشعار ۔۔۔

گر ترے حسن کے پرتو سیں فلک، ہوئے روشن
مہر مہتابی و مہتاب ستارا ہویگا

تاب اس رُخ کی تجلی کی نہیں تجھ کوں سراج
توں عبث شعلہء دیدار کی سوگند نہ کھا

دو رنگی خوب نہیں یک رنگ ہو جا
سراپا موم ہو یا سنگ ہو جا
یہی آہوں کے تاروں میں صدا ہے
کہ بارِ غم سیں خم جیوں چنگ ہو جا

منتظر ہوں جلوہ دیدار دکھلا بے حجاب
زلف کے تاروں کوں یکسو کر کہ دیکھوں آفتاب
صحنِ گلشن میں ہوا بے خود، جھلک اپنی دکھا
بلبل بے خانماں کی فکر کر اے گل شتاب
جب کبابِ دل سیں سیخِ آہ کھینچوں بے حجاب
تب تنورِ چرخ میں چھپ جائے قرصِ آفتاب
گرچہ ماہِ نو، فلک پر ہے ہلالی وقت کا
تاب کیا ہے بیتِ ابرو کا تری لاوے جواب
چشمِ طمع کوں جلوہء موہوم ہے مراد
پیاسے کوں ہے سراب میں عین الیقین آب

گنجِ ازل لگا ہے دلِ بے نوا کے ہات
آیا ہے کیا خزانہء غیبی گدا کے ہات
مدت سیں گم ہوا دل بے گانہء سراج
شاید کہ جا پڑا ہے کسی آشنا کے ہات

 

[شہزاد احمد]

کلیاتِ سراج سے انتخاب

عشق کے نامحرموں کوں زورِ عقلِ خام سیں
نکتہء سر بستہء اسرار پاناں کیا سکت

پنجہء عشق کے شکنجہ سیں
میں ہوا شش جہت میں بارہ باٹ

نہیں حقیقت میں حسن و عشق جدا
طوقِ قمری ہے طرہء شمشاد

نورِ جاں فانوس جسمی جدا کب ہے سراج
شعلہ تارِ شمع سیں کہتا ہے، من حبل الورید

تجھ ذات کے صفت میں لولاک حق نے بولا
ہے چشمِ دو جہاں کا، تو جان یا محمد صلی اللہ علیہ وسلم

پردہء چشمِ دل اگر وا ہوئے
مظہرِ دوست ہے در و دیوار

سراج اب نیک و بد سیں ہے مبرا
مئے وحدت کا پی کر جام یک بار

جب تلک عکسِ دوئی ہے تب تلک ہے گفت گو
طوطیء تصویر آئینہ نہیں گویا ہنوز

مجکوں یکدم قرار نہیں ہرگز
تجھ بغیر اختیار نہیں ہرگز
رازِ دل کوں رکھا ہوں پنہاں کر
اب تلک آشکار نہیں ہرگز

ہمیشہ دور عالم مختلف ہے
کہ ہے گردش میں ہر دم نیلگوں طاس

ہر درد میں جیوں قطب مجھے دیکھ کے ثابت
قربان مرے گرد ہو گردوں نے کہا بس

ہے کمندِ جہاں سیں جس کوں خلاص
خلوتِ قدس میں ہے خاص الخاص

جام مئے الست سیں بے خود ہوں اے سراج
دورِ شراب و شیشہء پرمُل سیں کیا غرض

سراج اب دل کی درپن صاف کر دیکھ
کہ زیرِ پا فلک ہے تجح کوں جیوں ارض

روشن ہے اے سراج کہ فانی ہے سب جہاں
مطرب غلط ہے جام غلط انجمن غلط

کلامِ نقطہء علم مختصر ہے سب معانی کا
بیانِ منطقِ درسی کوں نہیں انجام اے واعظ

خود بخود سیماب کون مت بوجھیو یہ اضطراب
کانپتا ہے دیکھ میری بیقراری ، الحفیظ

تماشائے حقیقت دیدہء ظاہر سیں ممکن نہیں
ہماری آنکھ کے پردوں سیں گویا سد ہوا واقع

حقیقت کے چمن کے باغباں نے خار و گل بویا
جہاں لگ گلشنِ عالم میں نیک و بد ہوا واقع

کیا ہے حق نے تجھے آفتابِ عالمگیر
نہ پاوے ذرہء معدوم عقل واں کا سراغ

مظہر میں کیا ظہور ہے مظہر کے نور کا
صورت سیں جا کے کعبہء معنی کا کر طواف

صافیء عل ہے جمالِ ذاتِ مطلق کوں محیط
ہے عبث آئینہء عالم نما کا اشتیاق

یار و اغیار کی صورت سیں ہوا ہے بیزار
مئے یک رنگیء وحدت جو پیا یار سیں مل
چشمِ عبرت سیں تماشائے جہاں کرتا ہوں
خاک در خاک ہے یہ انجمنِ گل در گل

مجھ پر اے محرمِ جاں پردہء اسرار کوں کھول
خوابِ غفلت سیں اٹھا دیدہء بیدار کوں کھول
دل کو اب دامن صحرائے جنوں یاد آیا
عقل کے دام سیں اس صید گرفتار کوں کھول

بوالہوس سیرِ بیابانِ فنا کیوں کہ کرے
حلقہء دام ہے یہاں نقشِ کفِ پائے غزال

گردشِ چرخ سیں آسیب نہیں عاشق کوں
غم میں ہے قطب کے مانند اوسے استقلال
شعرِ رنگیں نے غزالوں کوں کیا صید سراج
رشتہء دام ہے تارِ نگہِ دامِ خیال

ماسوا سیں ترے، مرے دل کوں
نہیں ہے کچھ احتیاج، ہے بیکل
آتشِ بیخودی میں جیوں سیماب
آشتابی، سراج ہے بیکل

صنم ہزار ہوا تو وہ صنم کا صنم
کہ اصل ہستیِ نابود ہے عدم کا عدم

 

[شہزاد احمد]

سراج اورنگ آبادی کے کلام میں سے چند منتخب اشعار

تازہ گل ہر باغ کا ہے مجھ نظر میں تازہ داغ
آتشِ سوزاں ہے فرشِ ماہتابی اے صنم

حالتِ وصل و جدائی کیا کہوں
ایک دم ہے حق میں میرے سو قرن
اے سراج اس شمع رو سیں جا کے بول
ہے جگر میں آتشِ غم شعلہ زن

عشق میں آ کہ عقل کوں کھوناں
باخرد ہو کے بے خرد ہوناں
ابرِ رحمت ہے بیج وحدت کا
کنج مخفی کے کھیت میں بوناں
خندہء گل ہے گر یہ شبنم
ہے ہنسی یار کی مرا روناں

مرادِ خاصِ اشک و آہ طوف کعبہء دل ہے
کوئی دریا سیں آتے ہیں کوئی صرا سیں آتے ہیں
سراج اس ہستیء موہوم کا احوال لکھنے کوں
عدم کے صاف تختے کشورِ عنقا سے آتے ہیں

یار کوں بے حجاب دیکھا ہوں
میں سمجھتا ہوں خواب دیکھا ہوں
نسخہ حسن میں ترے قد کوں
مصرعِ انتخاب دیکھا ہوں
دل ہوا تب سیں تاب سے بے تاب
جب سیں تجھ رخ کے تاب دیکھا ہوں

 

[شہزاد احمد]

سراج اورنگ آبادی کے چند اشعار

تجلیات الٰہی کا اوس میں پرتو ہے
ہوا ہے جب سیں دل آئینہ دارِ گلشن حسن

نہ تھا بے اختیاری کے محل میں اختیار اپنا
کروں کیا دل کے ہات آخر کوں سونپا کاروبار اپنا
سراج آتش سیں غم کی آسماں پر بھی قیامت ہے
کرن مت بوجھ سُورج نے جلایا تار تار اپنا

فجر اوٹھ یار کا دیدار کرناں
شبِ ہجراں کا دکھ اظہار کرناں
تصور میں ترے اے مظہرِ رب
تماشائے در و دیوار کرناں
سراج اب عشق کی پروانگی ہے
کہ سیرِ کوچہ و بازار کرناں

ہوئے اول قدم مانندِ منصور
جنہوں کوں عشق کی سرداریاں ہیں
نہ بوجھو آسماں پر تم ستارے
ہماری آہ کی چنگاریاں ہیں

نہیں ہے تیرِ حوادث سیں غم شہیدوں کوں
کہ لختِ دل کی سپر اپنے پاس رکھتے ہیں
سراج لطف ترے شعر کا وہی پاویں
جو کوئی کہ عقل و شعور و قیاس رکھتے ہیں

 

[شہزاد احمد]

سراج اورنگ آبادی کے چند اشعار پیش خدمت ہیں ۔۔۔

جو کوئی شادی کوں ماتم جانتے ہیں
ووہی کچھ لذتِ غم جانتے ہیں
کسی کوں رازِ پنہاں کی خبر نہیں
ہماری بات کوں ہم جانتے ہیں
سراج اِس شعلہ رو کے سوزِ غم میں
جلا ہے، اہلِ عالم جانتے ہیں

کیا قیامت ہے مرے دل لبھاناں جاناں
پھر تغافل کی اگن بیچ جلاناں جاناں
تم کوں لازم ہے کرم حالِ دلِ عاشق پر
جلوہء حسن دیکھا ناں نہ چھپاناں جاناں
دلِ سوزاں کی اگن مہر کے پانی سیں بجھا
کن نے بولا جلاناں نہ بجھاناں جاناں

بے برگِ گل پہ قطر شبنم کی کیا بہار
درپن میں چہرہء عرق افشاں کوں دیکھ توں
دل کا چراغ ہاتھ لے کر مَن عرف کی سیر
ظلمات بیچ چشمہ حیواں کوں دیکھ توں
گر تجھ کوں طوفِ کعبہ معنی کا عزم ہے
انسان ہے تو صورتِ انساں کوں دیکھ توں

پردہء عشق کا حکمت ستی کھولا ہوں طلسم
جامِ دل جب سیں ہوا خُمِ فلاطوں مجھ کوں

سبک روحانِ معنی بوئے گل ہیں باغِ عرفاں کے
ہر اک خارِ گراں جاں کوں خبر کیا ان لطیفوں سیں

گلشنِ شوق میں ہوں مست مئے یک رنگی
پھول کو ساغرِ مئے سرو کوں مینا سمجھوں
نقلِ ناز اصل میں ہے آئینہء عین نیاز
گلِ تصویر کوں میں بلبل گویا سمجھوں

جو ہوا منصور پایا ہے حقیقت کا نشاں
بوالہوس کوں نہیں رسائی عشق کے اسرار تَیں

لگے چھپنے خجل ہو جو ستارے صبحِ صادق کے
مگر روشن ہوا کوئی آفتاب ان مہ جبینوں میں
تری آنکھوں کی کیفیت چمن میں دیکھ کر نرگس
خجالت سیں گئی ہے ڈوب شبنم کے پسینوں میں

 

[شہزاد احمد]

یایا ہے تیرے نور سیں سب خلق نے ظہور
ذراتِ کائنات کا ہے آفتاب توں
اس موسمِ بہار میں ساقی مجھے پلا
جامِ عطا سیں بزم بقا کی شراب توں

کیا بلا کا ہے نشہ عشق کے پیمانے میں
کوئی ہوشیار نہیں عقل کے کاشانے میں

تمام گنج خفی کا کیا ہے سیر سراج
صفا کی راہ میں ہے جس کے پاس شمعِ یقیں

خدا جانے صبا نے کیا کہی غنچوں کے کانوں میں
کہ تب سیں دیکھتا ہوں عندلیبوں کوں فغانوں میں
کیا ہوں سیرِ حسن و دل کی یکرنگی کا گلشن میں
عوض بلبل کے برگِ گل پڑے تھے آشیانوں میں

پتھر بھی نہیں ہے شررِ شوق سیں خالی
بیتابیِ نبضِ رگِ خارا کی خبر لیو
اکثر ہے پریشانی و جمعیتِ دل کم
دیکھو تو ستاروں میں ثریا کی خبر لیو
شہبازِ حقیقت کا مکاں گوشہء دل ہے
اس قاف میں جا آپہہ سیں عنقا کی خبر لیو

اگر خواہش ہے تجکوں اے سراج آزاد ہونے کی
کمندِ عقل کوں ہرگز گلے کا ہار مت کیجو

گرچہ ہم ذرہء بے قدر ہیں تم ہو خورشید
ہر طرح سیں ہمیں اے گل بدن اپناں بوجھو

عجب ہے کہ غفلت و بینش ہیں لازم و ملزوم
بغیرِ چشم نہیں رنگِ خواب کا شیشہ
شرابِ نورِ جلالی سیں بس کہ ہے لبریز
سراج چرخ میں ہے آفتاب کا شیشہ

ہے حجابِ دوست دامن گیر آہ
نہیں تو جاتا چرخ اوپر تیر آہ
جامہء فانوس کیوں ہوئے آسماں
تکمہء دل ہے گریبان گیر آہ

دور کر دل سیں نقشِ دانائی
عاشقی میں کہاں ہے مرزائی
صبح کچھ شام کچھ مزاج ترا
خوب نہیں اس قدر بھی رعنائی
تجھ گلی سیں ہوا ہے روگرداں
تب سیں ہے آفتاب ہرجائی
دل ہمارا ہو سکندرِ وقت
چاک کر کر لباسِ دارائی

غیرت سیں تجھ رفتار کی ہے سرنگوں کبکِ دری
اور شرم سیں رخسار کے پنہاں نظر سیں ہے پری
خورشید رو کے رخ طرف ہرگز نہیں تابِ نظر
خط شعاعی ہے مگر ہر تارِ دستارِ زری
دارائے ملکِ راز ہو نوبت بجاؤں عشق کی
دل کا اگر مجکوں ملے آئینہ اسکندری

گنجِ مخفی سیں آشنا ہے سراج
جب سیں ہوئی ہے نگاہِ رحمانی

مرا آنسو اگر دریا کوں پہنچے یادِ ظالم میں
کماں دارِ فلک قوسِ قزح سیں تیر برساوے
سراج اب عاشقوں کوں انتظار نثاری ہے
پتنگوں کی مراد آوے اگر وو شمع رو آوے

جہاں وو نور کی تصویر گزرے خوش خرامی سیں
مہ و خورشید کوں آئینہ داِ نقشِ پا کہئے
ہوا ہے جیوں سراج ازبس کہ غم کی آگ میں سوزاں
دلِ بے تاب کوں پروانہء بزمِ فنا کہئے

عشق میں اول فنا درکار ہے
دل سیں ترکِ ماسوا درکار ہے
ترکِ مقصد عین مقصد ہے اوسے
جس کوں دل کا مدعا درکار ہے

مرا دل بحرِ بے پایانِ غم میں
جہازِ بے خودی کا ناخدا ہے
مرے غواصِ دل پر یوں ہے معلوم
کہ دریائے جنوں بے انتہا ہے

بجا ہے گر تمہارے نقش پا کی دھول اوڑنے سیں
ہر اک ذرہ کا استقبال، لینے آفتاب آوے
گل اپنے رنگ پر مغرور بیجا ہے ترے ہوتے
پسینا لاوے شبنم کا اگر اوس کوں حجاب آوے

وصل میں اضطراب جاتا نہیں
سو قرن مجکوں ایک ساعت ہے
پھر پتنگوں کا شور اٹھا ہے سراج
جلوہء شمع رو قیامت ہے

 

[شہزاد احمد]

اشعار ۔۔۔ از ۔۔۔ کلیاتِ سراج ۔۔۔۔


۔۔۔۔۔
جز شربت وصال نہیں ہے علاج اوسے
جس کے جگر میں دوریء ساقی کا درد ہے
ہے مطلعِ قصیدہء انوار جیوں سراج
دیوانِ کائینات سیں جو کوئی کہ فرد ہے

ہے کیا کتابِ مطلع انوار، رخ ترا
سورج کوں جس کا ایک ورقِ زرد بولئے
جیوں ہوئے ہیں محو، ہریک رنگِ گل میں ہم
اے بلبلو! صدائے اناالورد بولئے

جو کوئی نقصان میں سرمایہء بہبود کوں دیکھے
زمیں میں ڈال تخمِ دل، بر مقصود کوں دیکھے
بجا ہے گر کلیمِ وقت کہئے اے سراج اس کوں
کو کوئی ہریک تجلی میں ہوا الموجود کوں دیکھے

دل منتظرِ جلوہء خورشید ہوا ہے
ہر داغ اوسے روزنِ امید ہوا ہے
روشن ہے سبب عشق کے کیفیتِ عالم
آئینہء دل ساغر جمشید ہوا ہے

عجب میں ہوں کہ دل آئینہ دار کس کا ہے
کیا ہے آپ سیں بے اختیار کس کا ہے
دو چار آئینہ میں تجھ کو دیکھ سکتا نہیں
پھر اس جہاں میں مجھے اعتبار کس کا ہے
وو صبح اوپر اگر چرخ چرخ کھایا نہیں
تو مہر طشتِ جواہر نگار کس کا ہے
عجب نہیں ہے کہ ہوں بے قرار جیوں سیماب
برہ کی آگ ہے یہاں اختیار کس کا ہے

بازارِ جہاں سیر کیا نقدِ خرد لے
دل جنسِ محبت کا خریدار ہوا ہے

 

[شہزاد احمد]

سراج اورنگ آبادی کی کلیات سے انتخاب

قدرت کے باغ میں کاہے گل جس کوں دیکھئے
چاروں طرف بہار ہے کس کس کوں دیکھئے
کوئی نیم جاں ہے کوئی تڑپتا ہے کوئی شہید
اِن بسملوں کی صورتِ مجلس کوں دیکھئے

شعر سراج ہر یک ہے گلشن معانی
بو اس سخن کی پاوے جو خوش دماغ ہووے

دل کے پرزے ہوئے اب ایک ورق باقی ہے
سب تو آخر ہوئی کتاب، ایک سبق باقی ہے
خوابِ آشفتہء ہستی کی یہی ہے تعبیر
غیر فانی ہے مگر جلوہء حق باقی ہے

مینائے تن میں بوجھ غنیمت مئے حیات
جیوں دورِ جام دورِ فلک بے درنگ ہے

پندار ہستی سیں وہمی خیالوں نے کثرت کی تہمت لگائے ہیں ناحق
دراصل میں جوش طوفانِ وحدت ہے جیوں موجِ دریا امنگوں میں رہیئے

مرے گھر مہر سیں گر وو مہِ ابرو ہلال آوے
رقیبِ شوخ طینت کے ستارے پر زوال آوے
تماشہ دیکھ عالم کے چمن کا من کی آنکھوں سے
کہ تا توحید کے گل سیں تجھے بوئے کمال آوے

صاف مشرب ہے سب ستی ہم رنگ
آب ہر رنگ بیچ شامل ہے
ربع مسکونِ چار عنصر میں
کارفرمائے بے خودی دل ہے

ہے عشق کے آنے کی خبر خرمنِ دل پر
پیغام لکھا برق نے حاصل کوں ہمارے
جلتا ہے سراج آتشِ حسرت میں کہ وو شمع
روشن نہ کیا ظلمتِ محفل کوں ہمارے

 

[شہزاد احمد]

سراج اورنگ آبادی کی کلیات سے انتخاب

بوالہوس کیوں توں راہ بھولا ہے
عالمِ ظاہری ہیولا ہے
جس نے تجھ عشق کی شراب پیا
اس نے ہوش و خرد کوں بھولا ہے

ہم رنگ ہی فنا و بقا حسن و عشق کا
جس وقت اوسے نکالئے مجھ کو چھپائیے

شاید کہ حق کی ذرہ نوازی پہ تھی نظر
جیوں آفتاب حسنِ مدامی دیا تجھے

شربتِ دیدار کے بن زندگانی ہیچ ہے
بے رخِ ساقی حیاتِ جاودانی ہیچ ہے
بزمِ عرفاں میں نہیں ہے احتیاجِ جام مئے
مستِ وحدت کوں شراب ارغوانی ہیچ ہے
اس بہارِ بے بقا سیں جز فنا حاصل نہیں
فصلِ گل میں بلبلوں کی شعر خوانی ہیچ ہے
خندہء گل گریہء ناسور ہے گل رو بغیر
مجلسِ ماتم میں عیش و شادمانی ہیچ ہے

عشاق کے آنسو کا بیان مجھ سیں نہ پوچھو
حوتِ فلک اس بحر کی ماہی نظر آئی
دیکھا سراج آتش و خاک، آب و ہوا کوں
سب میں صفتِ ذات الٰہی نظر آئی

کیا ہے پردہء دل جس نے فانوس
سراج اس کوں خیالِ شمع رو ہے

ہائے جی کے سودے میں روز کا ہے ہنگامہ
چوک سیں عناصر کے یہ دکاں اٹھا دیجے
اے سراج ہر مصرع درد کا سمندر ہے
چاہئے سخن میرا آگ میں جلا دیجے

مت ہوئے اول توں سدا بلبل ہزاروں پھول کا
ایک باق بوجھئے، باقی کوں فانی کیجئے

کہاں ہر بوالہوس کوں تاب اس رُخ کی تجلی کی
کہ موسٰی کوں جواب "رب ارنی" "لن ترانی" ہے
ہمارے نالہء پرسوز سیں وسواس لازم ہے
نہ بوجھو اے صنم یہ آہ تیرا آسمانی ہے
اگرچہ حسب ظاہر میں ہے مجھ سیں سرگراں لیکن
سراج اس یار کوں پنہاں نگاہِ مہربانی ہے

صورتِ غنچہ و پیکاں ہے ایک
لیک ہر ایک میں خار اور ہی ہے
ہر خس و خار کوں نہیں سوز سراج
شعلہء جاں کا شرار اور ہی ہے

نہ ہووے کیوں اسے فریاد و زاری
جسے ہے شوق کی بے اختیاری
نہیں آرام کوں آرام ہرگز
ہوا دل میں قرارِ بے قراری

عجب کیا ہے فلک گر روز شب لے چاند سورج کوں
تصدق کوں ترے پر زر جُدا گوہر جدا لاوے
جو کوئی غواص ہو کر اے سراج اس بحر حسرت کا
اگر جا انتہا لاوے تو دُرِ بے بہا لاوے

خبر تحیر عشق سن نہ جنوں رہا نہ پری رہی
نہ تو تو رہا نہ تو میں رہا جو رہی سو بے خبری رہی
کیا خاک آتشِ عشق نے دل بے نوائے سراج کوں
نہ خطر رہا نہ حذر رہا مگر ایک بے خطری رہی

دیدہء اہل نظر گل رو کی صورت دیکھ کر
بلبل تصویر ہیں آئینہ ایجاد کے
جب کیا جزوِ پریشانِ سخن شیرازہ بند
تھے برس چوبیس میری عمر بے بنیاد کے

 

[شہزاد احمد]

اشعار ۔۔۔۔ مرزا ہزبر

عقل حیران ہو کئی محوِ تماشا ہو گیا
کیا کہوں اک لفظ کُن سے خلق کیا کیا ہو گیا
قادرِ مطلق اسی سے نام اوسکا ہو گیا
یہ اوسی پر ختم ہے جو امر چاہا ہو گیا
ذات احمد سے عیاں جلوہ احد کا ہو گیا
پردہء کثرت میں وحدت کا تماشا ہو گیا
کیا کہوں کس نے تجلی شانِ محبوبی میں کی
آپ کی صورت سے پیدا کس کا جلوا ہو گیا

اوٹھا پردہ دوئی کا جب تو وہ یکتا نظر آیا
حجابِ غیر مانع تھا مرے دل کی صفائی کا

ہزاروں گلوں کے ورق اوڑ گئے
چمن کا پریشان جو دفتر ہوا

تو سہی ترتا پھرے یہ آسمان شکلِ حباب
کیا غضب کرتی ہے اک دن چشم پرنم دیکھنا

دہانِ قبر سے کہتے ہیں ساکنان عدم
کہ سب کو خاک میں اک دن فلک ملا دیگا

دیا خدا نے جو معراج مین بشر کو اوج
نہ شمس کو نہ وہ ممکن ہوا قمر کو اوج

دم ہے مہان کوئی دم چند نفس ہے ہستی
بوریا ڈھونڈھ نہ کر تختِ سلیماں کی ہوس

چرخِ نہم سے بھی نظر آئے تو اے ہزبر
واں جا کے قصرِ یار کی دیوار دیکھیے

ہو گیا عقدِ ثریا چرخِ ہشتم پر خجل
چُن کے افشاں شب کو جب چھپکا لگایا آپ نے

محفل میں روز ہوتے ہیں سامان نئے نئے
پیدا کیے ہیں طرزِ مریجان نئے نئے

جاتے ہیں ہم جہانِ فانی سے
کون ٹھہرے یہاں تو ہل چل ہے
چاند سورج ہیں تختیوں سے خجل
کون سے نور کی یہ ہیکل ہے

 

[شہزاد احمد]

ولی دکنی کے چند اشعار

ہر ذرہء عالم میں ہے خورشید حقیقی
یوں بوجھ کے بلبل ہوں ہر اک غنچہ دہاں کا

حسن تھا پردہء تجرید میں سب سوں آزاد
طالب عشق ہوا صورت انسان میں آ

کثرت کے پھول بَن میں جاتے نئیں ہیں عارف
بس ہے موحداں کو منصور کا تماشا
وہ سربلند عالم ازبس ہے مجھ نظر میں
جیوں آسماں عیاں ہے مجھ دور کا تماشا

ہے مدرسے میں چرخ کے خورشید فیض بخش
جب سوں لیا ہے درس تری مکھ کتاب کا
مجلس ہے گرم چرخ کی تجھ آفتاب سوں
خالی ہے جام سرد اُپر ماہتاب کا

عیاں ہے ہر طرف عالم میں حسن بے حجاب اس کا
بغیر از دیدہء حیراں نئیں جگ میں نقاب اس کا
ہوا ہے مجھ پہ شمع بزم یک رنگی سوں یو روشن
کہ ہر ذرے اُپر تاباں ہے دائم آفتاب اس کا

 

[شہزاد احمد]

ولی دکنی کے کلام سے پسندیدہ اشعار ۔۔۔

نہ ہووے چرخ کی گردش سوں اس کے حال میں گردش
بجا ہے قطب کے مانند استقلال عاشق کا

طالب نئیں مہر و مشتری کا
دیوانہ ہوا جو تجھ پری کا

گر غرض ہے حاصل غیر گردش اس کوں جگ ہیں رات دن
جیوں سُرج لاگے ہیں جس کے دل منیں تیر چلا
یوں زمین عشق میں ہے، دام عاشق، نام یار
نام شہ جیوں ہوتا ہے نس دن گلوگیر طلا

اے ولی مجھ سخن کوں وو بوجھے
جس کو حق نے دیا ہے فکر رسا

گلشن منیں اس خلق کے وو مکھ ہے تیرا رشک گل
شبنم عرق کا جب اُڑا افلاک کا تارا ہوا

بسکہ اے نور نین تجھ میں ہے انسانیت
عشق سوں تیرے صنم صورت انساں ہوا

زندگی ہے جس کوں دائم عالم باقی منیں
جلوہ گر کب اُس اَنگے یو عالم فانی ہوا

روز ایجاد تری چشم سوں اے نور نظر
حسن کہ فرد پہ دیوان ازل صاد کیا

دیکھا ہے یک نگہ میں حقیقت کے ملک کوں
جب بے خودی کی راہ میں دل نے سفر کیا

کیوںکہ ذرات جہاں تجھ کوں پرستش نہ کریں
حق نے تجھ حسن کوں خورشید جہاں گیر کیا

سیر صحرا کی توں نہ کر ہرگز
دل کے صحرا میں گر خدا پایا
جب نہ آیا تھا شکم ماد میں
ابتدا سوں نہ انتہا پایا

جگ میں ولی سو کس کوں برابر کہے ترے
ذرے سوں ہے نزیک ترے کمتر آفتاب

ولی جنت منیں رہنا نئیں درکار عاشق کوں
جو طالب لامکاں کا ہے اسے مسکن سوں کیا مطلب

تجھ مکھ کی آرسی میں ہے نور خدا عیاں
روشن ہے تجھ جمال ستی کوہ طور صبح

سدا ہے اس خم نیلی سوں جوش زن یہ بات
کہ نقد ہوش فلاطوں ہے رونمائے قدح

یو آفتاب نئیں کہ عیاں ہے فلک اُپر
حق نے کیا جہاں میں ترا نقش پا بلند

برہ کے ہاتھ سوں گرداب غم میں جا پڑا ہے دل
کہو میری حقیقت چرخ بے بنیاد سوں جا کر

صنعت کے مصور نے صباحت کے صفحے پر
تصویر بنایا ہے تری نور کوں حل کر

تو بے شک روح ہے جگ میں خلاصہ چار عنصر کا
بجز تجھ روح کے قائم نہ ہو جگ کا بدن ہرگز

حقیقت کے لغت کا ترجمہ عشق مجازی ہے
وو پائے شرح میں مطلب، نہ بوجھے جو متن ہرگز
دم تسلیم سوں باہر نکلنا سو قباحت ہے
نہ دھر اس دائرے سوں ایک دم باہر چرن ہرگز

ولی جہاں کے گلستاں میں ہر طرف ہے خزاں
ولے بحال ہے وو سرو گل عذار ہنوز

خوش قداں سب اس انگے حیران ہیں
ہے لٹک میں جیوں کبک رفتار خاص

بادِ خزاں سوں رمز یہ سمجھا کہ جگ منیں
آتی ہے باغ عیش سوں بوئے ملال محض
یو بات عارفاں کی سنو دل سوں سالکاں
دنیا کی زندگی ہے یو وہم و خیال محض

اے ستم گر عاشقاں پر یوں نہ کر جور و ستم
خیر ہو شر کی حقیقت میں ہے یک مثقال قال

مجھے یک گھڑی تجھ بنا چین نئیں
ترے بن ہے ہر آن سینے پہ سال

عاشق مدام حال پریشاں سوں شاد ہے
آشفتگی کے بیچ ہے دائم فراغ گل

قِران کب ہو میسر ترا اے زہرہ جبیں
ہر ایک آن ہے مجھ حق میں سو قرن تجھ بن

راہ مضمون تازہ بند نہیں
تاقیامت کھلا ہے باب سخن

جگ میں اے خورشید دود چرخ زن ہے ذرہ وار
جن نے دل باندھا ہے تیرے حسن عالم گیر سوں

ولی اس ماہ کامل کی حقیقت جو نہیں سمجھا
وو ہرگز نئیں بجھا عال میں اکمل کے معانی کوں

مجھ عاشق یک رنگ سوں دو رنگ ہوا توں
تیری یہ دو رنگی گل رعنا پہ لکھا ہوں

طاقت نہیں کہ تیری ادا کا بیاں لکھے
ہے گرچہ بے نظیر عطارد حساب میں

مشرق سوں مغرب لگ سدا پھرتا ہے ہر ہر گھر ولے
اب لگ سُرج دیکھا نہیں ثانی ترا آفاق میں

جمعیت آسماں سوں، توقع بجا نہیں
ہیں آفتاب و ماہ ہمیشہ سفر میں

ولی گل رو کی دانش پر نظر کر
بہارِ حسن کوں چنداں بقا نئیں

سجن کے باج عالم میں دگر نئیں
ہمن میں ہے ولے ہم کو خبر نئیں
نہ پاوے صندلِ رازِ الٰہی
جسے گرمی سوں دل کی درد سر نئیں
ولی اس کی حقیقت کیوں کے بوجھوں
کہ جس کا بوجھنا حدِ بشر نئیں

جب لگ ہے آسماں و زمیں جگ میں برقرار
جیوں پھول اس جہاں کے چمن میں ہنسا کرو

پرت کے پنتھ میں جو کُئی سفر کرتے ہیں رات ہور دن
وو دنیا کوں بغیر از چاہ بابل کر نئیں گنتے

اس کوں حاصل کیوں کے ہوئے جگ میں فراغ زندگی
گردش افلاک ہے جس کوں ایاغ زندگی
اے عزیزاں سیر گلشن ہے گل داغ الم
صحبت احباب ہے معنی میں باغ زندگی
آسماں میری نظر میں کُلبہء تاریک ہے
گر نہ دیکھوں تجکوں اے چشم و چراغ زندگی

جو میرے حال کی گردش کوں دیکھے
اُسے گرداب گرداں یاد آوے
ولی میرا جنوں جو کُئی کہ دیکھے
اُسے کوہ و بیاباں یاد آوے

سُرج کو بوجھتا ہوں صبح کے تاراں سوں بھی کمتر
نظر میں میری جب وہ یار مہ رخسار آتا ہے

گر تجھ کوں ہے عزم سیر گلشن
دروازہء آرسی کھلا ہے
یک دل نئیں آرزو سوں خالی
برجا ہے محال اگر خلا ہے

کیوں نہ ہر ذرہ رقص میں آوے
جلوہ گر آفتاب سیما ہے
نہ رہے اس کے قد کوں دیکھ بجا
سرو ہر چند بائے برجا ہے

یہ درسوں تیرے جو نور چمکا سو اس سوں تارے ہوئے منور
یو چاند تجھ حسن کا جو نکلا فلک نے تجھ سوں اُچک لیا ہے

یہ ہستی موہوم دسے مجکوں سراب
پانی کے اُپر نقش ہے یہ مثلِ حباب
ایسے کے اُپر دل کوں نہ کر ہرگز بند
آپس کوں نہ کر خراب اے خانہ خراب

رکھ دھیان کوں ہر آن تو معبود طرف
رکھ سیس کوں ہر حال میں مسجود طرف
معدوم کوں موجود سوں کیا نسبت ہے
اولٰی ہے کہ مائل ہو توں موجود طرف

دیوان ازل بیچ خدائے بے چوں
یہ حکم کیا عام کہ ہاں 'کُن' فیکوں
افراد دو عالم کا بندھا شیرازہ
اس دفتر کونین پہ فہرست ہے توں

بوجھا ہے ولی تب ستی موہن نے سُرج کوں ۔۔۔ ذرے سوں بھی کمتر
کیتا ہے نظر جب ستی دستار زری پر ۔۔۔۔۔۔۔۔۔۔۔۔۔۔۔۔۔۔۔ لے ہاتھ میں درپن

وہ ہے روضہ زمین اُپر تیرا
شش جہت جس کوں دیکھ ہے ششدر

جیوں ستارے ٹوٹیں فلک اوپر
یوں انجھو مکھ اُپر پڑیں ڈھل ڈھل

جو ہوا تجھ سوں دور اے خورشید
ماہ کے مثل وو گھٹا گل گل

عشق سوں فارغ جو کُئی رہ نحس اکبر ہے مدام
ساتویں کھنڈ پر اگر ایوان کیوانی کرے

خلقت حق میں تو عرفاں کی نظر کھول کے دیکھ
ذرے ذرے کے بھیتر یہاں ہے جدا اک عالم

چراغ یہاں کے ستارے نمن ہیں گرداں نِت
دیے ہیں چرخ کوں تعلیم سبحہ گردانی

کیا حق اس رسول ارواح خاطر
مرتب چار دیوار عناصر

نئیں عالم شہود میں حجت کوں راہ دخل
حیران عشق کوں نہ کرے بے قرار بحث

 

[فرخ منظور]

جس کو سمجھا آشنا، نکلا غرض کا آشنا
دل ہے افسردہ نہایت گرمیِ احباب سے

کس کی زلفِ خم بہ خم پھر لے گئے تاب و قرار
شیفتہ پھر کچھ نظر آتے ہو تم بیتاب سے

(شیفتہ)

 

[فرخ منظور]

رقیبِ بوالہوس کا منہ ہے لطفِ جور کو دیکھے
وہ اپنی وضع کو دیکھے ہمارے طور کو دیکھے
(شیفتہ)

 

[فرخ منظور]

حالِ دل کس امید پر کہیے​

جب تمہیں اعتبار ہی نہ رہا​

​

بے قراری کہاں کہ دل ہی نہیں​

ہائے وہ بے قرار ہی نہ رہا​

​

دل کی اب روک تھام کون کرے​

ضبط پر اختیار ہی نہ رہا​

​

اب کوئی آرزو نہیں فانی​

دلِ امیدوار ہی نہ رہا​

​

(فانی بدایونی)​

 

[فرخ منظور]

ترے رخسارِ تاباں سے ہو کیا ہم تاب مہر اے گُل
کہ یوں ہے گلشنِ گردوں میں اِک بتی سی روشن ہے
(بہادر شاہ ظفرؔ)​

 

[فرخ منظور]

کیا یہاں سے وہاں سوا ہو گا؟
حشر میں بھی یہی خدا ہو گا

(نواب کلب علی خاں)​