رتن خاص دریائے لولاک کا - ملا غواصی (دکنی نعت)

[حسان خان]

رتن خاص دریائے لولاک کا​

جھلک لامکاں نور افلاک کا​

رتن = موتی​

​

محمد نبی سید المرسلیں​

سدا روشن اُس تے ہے دنیا و دیں​

تے = سے​

​

عدم میں تے عالم کوں پروردگار​

اوسی کے کیا نور سوں آشکار​

​

رواج آفرینش کیا سو وہیچ​

چراغ اہلِ بینش کرا سو وہیچ​

وہیچ = وہی​

کرا = کا​

​

ازل محض اوس کا خزینا دِسے​

ابد عین اوس کا مدینا دِسے​

دِسے = دِکھے​

​

ہوے ختم اس پر نبوت کے گُن​

بجے طبل اُس کا قیامت لگن​

گُن = کام​

لگن = تک​

​

نُم اُس کی دِسے لطف کا سلسبیل​

مکھی اُس کے ہے شہد کا جبرئیل​

نُم = ندی​

​

حرم کبریا کا سو اوس کا مقام​

بندا شمس ہور بدر اوس کا غلام​

​

جو کوئی اوس کے دم سوں ہے ہمدم سدا​

اچھے دو جہاں میں وو خُرّم سدا​

اچھے = ہے، ہو​

​

نِرادھار پاپی مرے سار کے​

ہیں امیدوار اُس کے دربار کے​

نِرادھار = بے سہارا​

پاپی = گنہگار​

سار = طرح​

​

رسولِ عرب ہور عجم آج وو​

رسولاں کے سب سیس کا تاج وو​

سیس = سر​

​

وہی دین کا کام بالا کیا​

بُہجن کفر کوں کر اجالا کیا​

بُہجن = دور​

​

ہے دو جگ پہ فرمان اوس کا رواں​

گدا اوس کے درگاہ کے خسرواں​

​

مطیع اوس کے سب حاملاں عرش کے​

تیواسیاں فلک اوس کے ہیں فرش کے​

تیواسیاں = قالین​

​

دِسیں سیوک اوس کے چمارے تمام​

کنکر اوس کے انگن کے تارے تمام​

سیوک = غلام​

کنکر = سنگریزہ​

انگن = صحن​

​

جو تیزی براق اوس کے ہے ران کا​

سچا برق ہے وہ نو اَسمان کا​

تیزی = اسپ​

اسمان = آسمان​

​

نہیں کوئی اُس تے بڑا قدر سوں​

بڑا سو وہی قدر اور صدر سوں​

​

حبیبِ خدا خواجۂ کائنات​

ہوے اوس تے نابود لات و منات​

​

سجے اوس نبوت کی انگشتری​

کہ پائی صفا اُس تے پیغمبری​

سجے = زیب دے​

​

محمد وہی ہور علی بھی وہیچ​

نبی بھی وہی اور ولی بھی وہیچ​

​

دیکھن ہار جو کوئی ہے ان دو میں فرق​

ضلالت کے دریا میں جم وو ہے غرق​

جم = ہمیشہ​

​

جو کوئی منکر اُس کے اچھے شرع تے​

نہ کیوں خوار ہوئے اصل ہور فرع تے​

​

بڑے بخت جو میں غواصیؔ غلام​

ہوں ایسے نبی کا علیہ السلام​

​

سدا پاؤں سکھ میں اُسے یاد کر​

ہزاراں درود اُس کی اولاد پر​

​

(ملا غوّاصی)​

​

ماخوذ از مثنوی طوطی نامہ (سنہِ تصنیف: ۱۰۴۹ ہجری)​